افغانستان: کنڑ میں اتحادی فوج کی فضائی بمباری، پاکستانیوں سمیت 50 داعش جنگجو ہلاک

کابل (ویب ڈیسک) افغانستان میں اتحادی افواج نے فضائی حملے میں کم ازکم 50 داعش جنگجوؤں کی ہلاکت کا دعویٰ کیا ہے جب کہ طالبان کے پولیس چیک پوسٹوں پر حملے میں 7 اہلکار جاں بحق ہوگئے۔

بین الاقوامی خبر رساں ادارے کے مطابق افغانستان صوبے کنڑ میں اتحادی افواج نے فضائی بمباری میں داعش جنگجوؤں کے ٹھکانوں کو نشانہ بنایا جس کے نتیجے میں 50 داعشی جنگجو ہلاک ہوگئے۔ یہ ہلاکتیں کنڑ میں دو مختلف مقامات پر فضائی بمباری کے نتیجے میں ہوئیں۔

Breaking…
May 4, 2019
Coalition Forces in coordination with Afghan ground forces carried two airstrikes on ISIS training centers in Degal Sar area, Chapa Darah, Kunar province; in which, 43 ISIS terrorists including Uzbekistan & Pakistani foreign citizens were killed.

— Ministry of Defense, Afghanistan (@MoDAfghanistan) May 4, 2019

افغان فوج کے ترجمان نے دعویٰ کیا ہے کہ صوبے کنڑ کے ضلع چھاپرا میں کیے گئے فضائی حملے میں ہلاک ہونے والوں جنگجوؤں میں سے اکثریت بیرون ملک سے آئے ہوئے افراد کی ہے۔ افغان وزارت دفاع کا کہنا ہے کہ ہلاک ہونے والوں میں ازبک اور پاکستانی دہشت گرد بھی شامل ہیں ان علاقوں میں تاحال شدت پسند جماعتیں متحرک ہیں۔

دوسری جانب افغان طالبان نے بادغیس کے علاقے میں پولیس چیک پوسٹوں پر دھاوا بول دیا جس کے نتیجے میں 7 پولیس اہلکار جاں بحق ہوگئے جب کہ قاضی کے علاقے میں طالبان حملے میں 3 سیکیورٹی اہلکار زخمی ہوئے۔ ان علاقوں میں افغان سیکیورٹی فورسز کی مزید نفری تعینات کردی گئی ہے۔

واضح رہے کہ گزشتہ روز عظم مشاورتی جرگے سے خطاب کرتے ہوئے افغان صدر اشرف غنی نے 175 طالبان جنگجوؤں کی رہائی کا اعلان کرتے ہوئے امن مذاکرات کے تناظر میں مشروط جنگ بندی کا عندیہ دیا تھا تاہم اس پر طالبان کی جانب سے کوئی ردعمل سامنے نہیں آیا ہے۔