افغانستان : قندھار میں خواتین کے انڈرویئر و دیگر ضروری اشیاء فروخت کرنے والے 18 دکاندار گرفتار

کابل(ڈیلی اردو) افغانستان کے صوبہ قندھار میں طالبان کے امر بالمعروف و نہی عن المنکر کے اہلکاروں نے خواتین کے زیرِ جامہ(انڈر ویئر) سمیت دیگر ضروری اشیا فروخت کرنے والے 18 دکانداروں کو گرفتار کرلیا۔

مقامی ذرائع کے مطابق دکانداروں کو قندھار شہر کے چہاراہی شہیدان سے متصل رنگ ریزان گلی میں گزشتہ شام حراست میں لیا گیا۔ گرفتار افراد خواتین کے زیرِ جامہ، ملبوسات اور دیگر ضروری اشیا کی خرید و فروخت کرتے تھے۔

ذرائع کا کہنا ہے کہ بیشتر دکانداروں کو داڑھی منڈوانے اور خواتین کے ساتھ خرید و فروخت کے دوران مبینہ طور پر طالبان کے مقرر کردہ ضوابط کی خلاف ورزی کے الزامات میں گرفتار کیا گیا۔

مقامی ذرائع کے مطابق طالبان کی جانب سے مختلف الزامات کے تحت شہریوں کی گرفتاریوں کا سلسلہ جاری ہے۔ اس سے قبل ہرات میں اقوام متحدہ سے وابستہ بعض ملازمین کو بھی داڑھی سے متعلق ضوابط کی خلاف ورزی کے الزام میں حراست میں لیے جانے کی اطلاعات سامنے آئی تھیں۔

واضح رہے کہ قندھار میں خواتین کے زیرِ جامہ کی فروخت پر طالبان کی جانب سے پابندیوں سے متعلق رپورٹس اس سے پہلے بھی سامنے آچکی ہیں۔