افغان طالبان کا نیٹ ورکس اور انکے پراکسیز کو انجام تک پہنچایا جائیگا، پاکستانی وزیرِاعظم

کوئٹہ (ڈیلی اردو) پاکستان کے وزیرِاعظم شہباز شریف نے کہا ہے کہ “آپریشن غضب للحق” پوری قوت اور عزم کے ساتھ جاری ہے تاکہ افغان طالبان سے وابستہ دہشت گرد نیٹ ورکس اور پراکسیز کے خلاف کارروائی کی جا سکے اور شہریوں کی جان و مال کا تحفظ یقینی بنایا جا سکے۔

وزیراعظم نے یہ بات کمانڈ اینڈ اسٹاف کالج کوئٹہ کے دورے کے موقع پر فیکلٹی اور زیر تربیت افسران سے خطاب کرتے ہوئے کہی۔ 

ان کا کہنا تھا کہ دہشت گردوں کے ٹھکانوں اور ان کے معاونت فراہم کرنے والے ڈھانچوں کو سختی سے نشانہ بنایا جا رہا ہے۔

انہوں نے کہا کہ پاکستان نے کشیدگی کے باوجود تحمل اور دانشمندی کی پالیسی اپنائی، جسے عالمی برادری نے بھی سراہا۔ 

پاکستانی وزیراعظم کے مطابق بھارت کی جانب سے حملوں اور جارحیت کے مقابلے میں پاکستان کا مؤقف ذمہ دارانہ رہا ہے۔

وزیراعظم نے قومی خودمختاری کے تحفظ اور ملک میں امن و استحکام کے لیے مسلح افواج کی پیشہ ورانہ صلاحیت، تیاری اور قربانیوں کو بھی خراجِ تحسین پیش کیا۔

اس موقع پر وفاقی وزراء دفاع، داخلہ اور اطلاعات سمیت وزیر اعلیٰ بلوچستان بھی موجود تھے۔