امریکا کا شام میں فوجی کمی کا فیصلہ، داعش کے خلاف آپریشن جاری رکھنے کا اعلان

واشنگٹن (نمائندہ ڈیلی اردو) امریکا نے شام میں اپنی افواج کی تعداد میں نمایاں کمی کا اعلان کیا ہے۔ پینٹاگون کے مطابق، شام میں موجود امریکی فوجیوں کی تعداد کو ایک ہزار سے کم کیا جائے گا، تاہم داعش کے خلاف کارروائیاں جاری رہیں گی۔

امریکی محکمہ دفاع کا کہنا ہے کہ یہ فیصلہ شام میں داعش کے خلاف حاصل ہونے والی کامیابیوں کے پیش نظر کیا گیا ہے۔ ادارے نے اس بات کا اعادہ کیا کہ مشرقِ وسطیٰ میں داعش کے خلاف بین الاقوامی آپریشن “انہیرنٹ ریزولو” بدستور جاری رہے گا۔

پینٹاگون کے مطابق 2019 میں داعش کی نام نہاد خلافت کے خاتمے کے بعد عالمی اتحاد نے خطے میں اہم کردار ادا کیا، جبکہ امریکی سینٹرل کمانڈ نے گزشتہ برس داعش کے ٹھکانوں پر متعدد فضائی حملے کیے۔ حکام کا کہنا ہے کہ فوجی کمی کے باوجود خطے میں امریکی افواج کی آپریشنل صلاحیت برقرار رکھی جائے گی۔

بیان میں عالمی برادری پر زور دیا گیا کہ وہ داعش کے قیدیوں سے متعلق مسئلے کے حل کے لیے سنجیدہ اقدامات کرے، کیونکہ یہ مسئلہ نہ صرف علاقائی سلامتی بلکہ عالمی استحکام سے بھی جُڑا ہوا ہے۔

واضح رہے کہ 2023 کے اواخر میں ایران کے حمایت یافتہ گروہوں کی جانب سے امریکی مفادات پر مسلسل حملوں کے باعث شام میں امریکی فوجیوں کی تعداد عارضی طور پر 2 ہزار تک بڑھا دی گئی تھی۔ یہ فیصلہ غزہ جنگ سے جُڑی علاقائی کشیدگی کے پیش نظر کیا گیا تھا۔

اعداد و شمار کے مطابق، 2024 میں داعش نے شام میں 294 حملے کیے، جب کہ 2025 کے ابتدائی مہینوں میں تنظیم اب تک کم از کم 44 حملے کر چکی ہے، جو ظاہر کرتا ہے کہ خطرہ مکمل طور پر ختم نہیں ہوا۔