امریکہ اور ایران مذاکرات: پاکستان نے ثالثی کا کردار ادا کیا، شہباز شریف

اسلام آباد (ڈیلی اردو) وزیرِ اعظم شہباز شریف نے کہا ہے کہ پاکستان خطے میں امن کے فروغ کے لیے اپنی کوششیں جاری رکھے ہوئے ہے اور امریکہ اور ایران کے درمیان ایک ’’مخلص ثالث‘‘ کا کردار ادا کر رہا ہے۔

اسلام آباد میں امریکی سفارتخانے میں امریکہ کی 250 ویں سالگرہ کے موقع پر منعقدہ تقریب سے خطاب کرتے ہوئے وزیرِ اعظم شہباز شریف نے کہا کہ وہ جنوبی ایشیا میں قیامِ امن کے لیے امریکی صدر ڈونلڈ ٹرمپ کے ہمیشہ شکر گزار رہیں گے اور انہیں ’’امن کے داعی‘‘ کے طور پر یاد رکھا جائے گا۔

وزیرِ اعظم نے کہا کہ پاکستان کو امریکہ اور ایران دونوں کے اعتماد پر فخر ہے اور وہ اس اعتماد کے اظہار پر دونوں ممالک کے شکر گزار ہیں۔

اپنے خطاب میں وزیرِ اعظم نے علاقائی امن اور استحکام کے لیے پاکستان کی کوششوں کو آگے بڑھانے پر فیلڈ مارشل عاصم منیر کا بھی شکریہ ادا کرتے ہوئے کہا کہ پاکستان خطے میں پائیدار امن کے قیام کے لیے کردار ادا کرتا رہے گا۔

اس موقع پر پاکستان میں امریکی ناظم الامور نیٹلی بیکر نے بھی خطاب کرتے ہوئے کہا کہ 1979 کے انقلاب کے بعد امریکہ اور ایران کے درمیان اعلیٰ سطحی مذاکرات اسلام آباد میں منعقد کروانے میں پاکستان نے اہم کردار ادا کیا۔

انہوں نے کہا کہ تہران اور واشنگٹن دونوں کے ساتھ تعلقات کی وجہ سے پاکستان کو دو مخالف ممالک کو مذاکرات کی میز پر لانے میں ایک منفرد حیثیت حاصل رہی۔

نیٹلی بیکر کا کہنا تھا، ’’یہ پاکستان کا لمحہ تھا اور پاکستان اس پر پورا اترا۔‘‘

وزیرِ اعظم شہباز شریف نے تقریب کے اختتام پر امید ظاہر کی کہ خطے میں جلد پائیدار امن قائم ہوگا۔