امریکی ایوان نمائندگان نے ایران جنگ روکنے کی قرارداد منظور کر لی

واشنگٹن (ش ح ط) ایران جنگ کے معاملے پر امریکی ایوانِ نمائندگان نے صدر ڈونلڈ ٹرمپ کے اختیارات محدود کرنے کی قرارداد منظور کر لی۔

ڈیلی اردو کے مطابق ایران کے خلاف ممکنہ یا جاری فوجی کارروائیوں کے حوالے سے صدر ٹرمپ کے اختیارات محدود کرنے کی قرارداد ڈیموکریٹس کی جانب سے پیش کی گئی، جسے 215 کے مقابلے میں 208 ووٹوں سے منظور کر لیا گیا۔

رپورٹس کے مطابق قرارداد کے حق میں چار ریپبلکن ارکان نے بھی ڈیموکریٹس کا ساتھ دیا، جو ایران سے متعلق امریکی پالیسی پر بڑھتے ہوئے سیاسی اختلافات کی نشاندہی کرتا ہے۔

قرارداد کے تحت ایران کے خلاف کسی بھی نئی جنگی کارروائی یا فوجی اقدام کے لیے کانگریس کی منظوری درکار ہوگی، جس کا مقصد جنگی اختیارات پر کانگریس کے آئینی کردار کو برقرار رکھنا ہے۔

یہ پیش رفت ایسے وقت میں سامنے آئی ہے جب ایران اور امریکا کے درمیان کشیدگی، فوجی کارروائیوں اور جنگ بندی کے معاملات پر واشنگٹن میں سیاسی بحث شدت اختیار کر گئی ہے۔

رپورٹس کے مطابق متعدد ارکانِ کانگریس کا مؤقف ہے کہ آئین کے تحت جنگ سے متعلق بڑے فیصلوں میں کانگریس کی منظوری ضروری ہے اور کسی بھی وسیع فوجی کارروائی کے لیے انتظامیہ اکیلے فیصلہ نہیں کر سکتی۔

اب یہ قرارداد مزید کارروائی کے لیے امریکی سینیٹ میں پیش کی جائے گی، جہاں اس کے مستقبل پر سیاسی بحث متوقع ہے۔