امریکی صدر ٹرمپ نے ایران کی تجاویز مسترد کر دیں، بحری محاصرے کا اعلان

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ وہ ایران کی جانب سے مذاکرات کے لیے پیش کی گئی نئی تجاویز سے مطمئن نہیں اور ممکنہ معاہدہ تاحال غیر یقینی صورتحال کا شکار ہے۔

جمعے کو وائٹ ہاؤس میں صحافیوں سے گفتگو کرتے ہوئے امریکی صدر کا کہنا تھا کہ ایران معاہدہ کرنا چاہتا ہے، تاہم پیش کردہ تجاویز قابلِ قبول نہیں۔ انہوں نے کہا، “ہم نے ایران کے ساتھ بات چیت کی ہے، لیکن میں اس وقت ان کی پیشکش سے خوش نہیں ہوں، انہیں بہتر ڈیل کرنی ہوگی۔”

صدر ٹرمپ کے مطابق دونوں ممالک کے درمیان رابطے جاری ہیں، جن میں ٹیلی فونک بات چیت بھی شامل ہے، تاہم انہوں نے اس شک کا اظہار کیا کہ آیا ایران واقعی کسی حتمی معاہدے تک پہنچ پائے گا یا نہیں۔

فلوریڈا میں ایک خطاب کے دوران ٹرمپ نے بتایا کہ ’آبنائے ہرمز کے حوالے سے انھوں نے کہا کہ مختلف ایرانی شخصیات براہ راست رابطے کر رہی ہیں اور معاہدے کی کوشش کر رہی ہیں، جبکہ واشنگٹن اس بات کا تعین کر رہا ہے کہ کس فریق سے باضابطہ مذاکرات کیے جائیں۔

انہوں نے آبنائے ہرمز کے حوالے سے کہا کہ ایران اسے برسوں سے دباؤ کے ہتھیار کے طور پر استعمال کرتا رہا ہے، تاہم امریکہ نے اس حکمت عملی کو ناکام بنا دیا ہے۔ ان کا کہنا تھا کہ امریکی اقدامات کے باعث ایران کی بحری سرگرمیوں کو محدود کر دیا گیا ہے۔

امریکی صدر نے ایران کی عسکری صلاحیتوں سے متعلق بڑے دعوے بھی کیے۔ ان کے مطابق ایران کا فضائی دفاع اور ریڈار نظام شدید متاثر ہو چکا ہے، جبکہ میزائل تنصیبات اور پیداوار کی صلاحیت کو بھی بڑی حد تک نقصان پہنچایا گیا ہے۔ انہوں نے یہ بھی دعویٰ کیا کہ درجنوں ایرانی بحری جہاز تباہ کیے جا چکے ہیں۔

ٹرمپ نے واضح کیا کہ امریکہ ایران کو کسی صورت جوہری ہتھیار حاصل کرنے کی اجازت نہیں دے گا، کیونکہ اس سے اسرائیل، یورپ اور خود امریکہ کو خطرہ لاحق ہو سکتا ہے۔

امریکی صدر نے ایران کے خلاف بحری محاصرے کی تصدیق کرتے ہوئے کہا کہ امریکی بحریہ ایرانی بندرگاہوں کے خلاف سخت کارروائیاں کر رہی ہے۔

 انہوں نے ایک حالیہ واقعے کا حوالہ دیتے ہوئے کہا کہ ایک جہاز کو تحویل میں لے کر اس کا سامان اور تیل قبضے میں لیا گیا۔

ٹرمپ نے کہا، “ہم تقریباً بحری قزاقوں کی طرح کام کر رہے ہیں، لیکن ہم سنجیدہ ہیں۔”

رپورٹس کے مطابق ایران سے منسلک متعدد جہاز ایشیائی پانیوں میں امریکی کارروائیوں کا نشانہ بنے ہیں، جہاں پابندیوں کی زد میں آنے والے آئل ٹینکرز اور کنٹینر بردار جہازوں کو بھی تحویل میں لیا گیا۔

واضح رہے کہ جنگی کشیدگی کے بعد ایران نے آبنائے ہرمز سے بیشتر بین الاقوامی جہازوں کی آمدورفت محدود کر دی ہے، جس کے جواب میں امریکہ نے ایرانی بندرگاہوں کے خلاف بحری ناکہ بندی کا اعلان کیا تھا۔

موجودہ صورتحال میں ایران اور امریکہ کے درمیان کشیدگی برقرار ہے، مذاکرات تعطل کا شکار ہیں اور خطے میں مزید تصادم کے خدشات بڑھتے جا رہے ہیں۔۔