ایرانی حکومت کا خاتمہ اسرائیل کا اہم ہدف، نظام کمزور ہوچکا ہے، جلد گرا سکتے ہیں: نیتن یاہو

تل ابیب(ڈیلی اردو) اسرائیلی وزیراعظم بنیامین نیتن یاہو نے دعویٰ کیا ہے کہ ایران کا موجودہ اسلامی جمہوری نظام اپنی تاریخ کے کمزور ترین ادوار میں سے ایک سے گزر رہا ہے اور اسرائیل و امریکا کے لیے اسے اقتدار سے ہٹانا اب ممکن ہوچکا ہے۔

اسرائیلی میڈیا کے مطابق نیتن یاہو نے فوجی قیادت کے سامنے خطاب کرتے ہوئے کہا کہ ایرانی حکومت اس وقت شدید دباؤ میں ہے اور اپنی بقا کے لیے جدوجہد کر رہی ہے۔ ان کے بقول ایران میں موجودہ نظام کا خاتمہ اسرائیل کے اہم اہداف میں شامل ہے۔

نیتن یاہو نے کہا کہ انہیں یقین ہے کہ اسرائیل ایران سے لاحق خطرے کو مستقل طور پر ختم کرنے کی صلاحیت رکھتا ہے۔ انہوں نے دعویٰ کیا کہ ایرانی حکومت کو گرانا اب کوئی ناقابلِ حصول مقصد نہیں بلکہ اسرائیل اور امریکا کی دسترس میں ہے۔

ایرانی حکومت کے خلاف کارروائی جاری رکھنے کا دعویٰ

ایک اسرائیلی ٹی وی انٹرویو میں نیتن یاہو نے مزید کہا کہ اسرائیل ایران میں موجودہ حکومت کے خلاف کارروائی آگے بڑھانے کے لیے کام کر رہا ہے اور ان کی ہدایت پر اسرائیلی ادارے اس مقصد کے لیے سرگرم ہیں۔

انہوں نے یہ بھی دعویٰ کیا کہ اسرائیلی فضائیہ کے پائلٹ کسی بھی وقت ایران میں کارروائی کے لیے پہنچ سکتے ہیں، تاہم انہوں نے اس حوالے سے مزید تفصیلات فراہم نہیں کیں۔

غزہ میں اسرائیلی کنٹرول کا بھی دعویٰ

غزہ کی صورتحال پر بات کرتے ہوئے نیتن یاہو نے دعویٰ کیا کہ اسرائیلی فوج غزہ کے تقریباً 60 فیصد علاقے پر کنٹرول رکھتی ہے۔ ان کے مطابق غزہ میں اسرائیل کے مقاصد میں حماس کو غیر مسلح کرنا اور علاقے کو غیر عسکری بنانا شامل ہے۔

اسرائیلی وزیراعظم طویل عرصے سے ایران کی موجودہ حکومت کو اسرائیل کی سلامتی کے لیے بڑا خطرہ قرار دیتے رہے ہیں، تاہم ایرانی حکومت کے خاتمے سے متعلق ان کے تازہ بیانات کو اسی وسیع تر مؤقف کے تسلسل کے طور پر دیکھا جا رہا ہے۔