ایرانی سیکورٹی فورسز کے ہاتھوں مظاہرین کی ہلاکتیں 30 ہزار کے قریب

نیو یارک (ڈیلی اردو) ٹائم میگزین کا کہنا ہے کہ ہفتوں سے ایران کو ہلا کر رکھ دینے والے ہنگاموں میں مرنے والوں کی تعداد 30 ہزار  سے تجاوز کر سکتی ہے۔ امریکی جریدے نے اتوار کے روز صحت کے دو مقامی اعلیٰ حکام کے حوالے سے رپورٹ دی کہ صرف آٹھ اور نو جنوری کو، جب ملک میں حالیہ لہر کے سب سے بڑے احتجاج دیکھے گئے، ایرانی سیکورٹی فورسز کے ہاتھوں ہلاک ہونے والوں کی تعداد ’’30 ہزار کے قریب‘‘ ہو سکتی ہے۔

ان حکام کا کہنا تھا کہ ان دنوں لاشوں کی تعداد اتنی زیادہ تھی کہ ریاست کے پاس انہیں ٹھکانے لگانے کی گنجائش ختم ہو گئی تھی۔ انہوں نے مزید بتایا کہ حکام کے پاس لاشیں رکھنے والے بیگز (body bags) ختم ہو گئے تھے اور ایمبولینسوں کے بجائے سیمی ٹرک استعمال کیے گئے۔

ایران میں احتجاج کا آغاز دسمبر کے آخر میں گہرے معاشی بحران اور بڑھتی ہوئی مہنگائی کے باعث ہوا تھا، لیکن جلد ہی یہ ایران کے آمرانہ نظام کے خلاف سیاسی مظاہروں میں بدل گیا۔ ایرانی سکیورٹی فورسز نے ان ہنگاموں کو تشدد کے ذریعے کچل دیا ہے، اور رپورٹس بتاتی ہیں کہ ہزاروں افراد ہلاک ہو چکے ہیں۔

امریکہ میں قائم ’ہیومن رائٹس ایکٹوسٹس ان ایران‘ کی نیوز ایجنسی کے مطابق، گروپ نے 5,495 اموات کی تصدیق کی ہے، جن میں 5,149 مظاہرین شامل ہیں، جبکہ مزید 17,031 مشتبہ ہلاکتوں کی تصدیق کی کوشش کی جا رہی ہے۔ سکیورٹی فورسز کے کریک ڈاؤن میں مزید 7,403 افراد کے شدید زخمی ہونے جبکہ 40,887 افراد کی گرفتاری کی اطلاع ہے۔

انسانی حقوق کے کارکنوں نے بارہا اس بات پر زور دیا ہے کہ تین ہفتے قبل ایرانی حکام کی جانب سے انٹرنیٹ کی بندش کی وجہ سے ہلاکتوں کی تصدیق میں وقت لگ رہا ہے۔ 

دوسری جانب، جنیوا میں ایرانی سفیر کے مطابق حکام نے سرکاری طور پر مرنے والوں کی تعداد 3,117 بتائی ہے، جن میں سے 2,400 سے زائد افراد ’’دہشت گردانہ سرگرمیوں‘‘ کے دوران ہلاک ہوئے۔

تہران نے اپنے سخت حریفوں، اسرائیل اور امریکہ پر ان احتجاجات کے پیچھے ہونے کا الزام لگایا ہے۔