ایران میں سڑک کنارے بم دھماکا، پاسداران انقلاب کے 5 اہلکار ہلاک ہونے کا دعویٰ

تہران(ڈیلی اردو) ایران کے جنوب مشرقی صوبے سیستان و بلوچستان میں سڑک کنارے نصب بم کے دھماکے میں پاسداران انقلاب کے پانچ اہلکاروں کی ہلاکت کا دعویٰ سامنے آیا ہے، تاہم ایرانی حکام کی جانب سے جاری ابتدائی بیان میں صرف ایک اہلکار کی ہلاکت کی تصدیق کی گئی ہے۔

ایرانی میڈیا کے مطابق پاسداران انقلاب کی زمینی افواج کے جنوب مشرقی قدس ہیڈکوارٹر نے بتایا کہ سیکیورٹی فورسز کے قافلے کو سڑک پر نصب بم کے ذریعے نشانہ بنایا گیا۔ ایرانی حکام نے حملے میں ملوث افراد کو دہشتگرد قرار دیتے ہوئے ان کی شناخت اور گرفتاری کے لیے کارروائی جاری رکھنے کا اعلان کیا ہے۔

مقامی ذرائع کے مطابق یہ واقعہ زاہدان کے قریب رودماہی کے علاقے میں پیش آیا، جہاں پاسداران انقلاب کی ایک گاڑی کے قریب دھماکا ہوا، جس کے بعد مسلح افراد کی جانب سے فائرنگ کیے جانے کی اطلاعات بھی سامنے آئی ہیں۔

ایران انٹرنیشنل نے مقامی ذرائع کے حوالے سے دعویٰ کیا ہے کہ واقعے میں پاسداران انقلاب کی قدس فورس سے وابستہ فاطمیون ملیشیا کے پانچ اہلکار ہلاک ہوئے۔ تاہم پاسداران انقلاب کے سرکاری بیان میں فاطمیون کا ذکر نہیں کیا گیا اور نہ ہی ہلاک ہونے والے اہلکاروں کی مکمل تعداد یا واقعے کا درست مقام بتایا گیا۔

ترکی کی سرکاری خبر رساں ایجنسی نے بھی ایرانی حکام کے حوالے سے سڑک کنارے بم دھماکے اور ایک اہلکار کی ہلاکت کی اطلاع دی ہے۔

یہ واقعہ سیستان و بلوچستان میں حالیہ دنوں کے دوران مسلح جھڑپوں اور سیکیورٹی کارروائیوں میں اضافے کے پس منظر میں پیش آیا ہے۔ ایرانی حکام نے اس سے قبل صوبے میں ایک کارروائی کے دوران چھ مسلح افراد کو ہلاک کرنے کا دعویٰ بھی کیا تھا۔

واقعے کی ذمہ داری تاحال کسی تنظیم نے قبول نہیں کی، جبکہ مختلف ذرائع کی جانب سے ہلاکتوں کی تعداد کے حوالے سے متضاد اطلاعات سامنے آ رہی ہیں۔