ایران میں مظاہرین کی ہلاکتیں 3 ہزار سے متجاوز، 147 سکیورٹی اہلکار بھی شامل

واشنگٹن (ڈیلی اردو) امریکہ میں قائم انسانی حقوق کی تنظیم ہیومن رائٹس ایکٹیوسٹس نیوز ایجنسی (HRANA) نے دعویٰ کیا ہے کہ بدھ کی صبح تک ایران میں جاری احتجاجی مظاہروں کے دوران ہلاک ہونے والوں کی تعداد کم از کم 3 ہزار تک پہنچ چکی ہے۔

تنظیم کے مطابق اگر ان اعداد و شمار کی غیر جانبدار ذرائع سے تصدیق ہو جاتی ہے تو یہ گزشتہ کئی دہائیوں کے دوران ایران میں ہونے والے کسی بھی احتجاجی یا بدامنی کے دور میں ہلاکتوں کی سب سے بڑی تعداد ہو گی۔ مبصرین کا کہنا ہے کہ ایران میں موجودہ حالات 1979 کے اسلامی انقلاب کے دوران پیدا ہونے والی افراتفری اور انتشار کی یاد دلا رہے ہیں۔

ادھر امریکی صدر ڈونلڈ ٹرمپ نے ہلاکتوں سے متعلق اطلاعات سامنے آنے کے بعد ایرانی قیادت کو متنبہ کرتے ہوئے کہا ہے کہ امریکہ ہر قسم کے مذاکرات ختم کر رہا ہے اور حالات کے مطابق آئندہ اقدامات کرے گا۔

ایران میں کریک ڈاؤن کی تفصیلات منگل کو اس وقت سامنے آنا شروع ہوئیں جب احتجاج کے آغاز پر حکام کی جانب سے ملک بھر میں مواصلاتی نظام معطل کیے جانے کے بعد ایرانی شہریوں نے پہلی بار بیرونِ ملک سے فون کالز وصول کرنا شروع کیں۔

تازہ صورتحال

اجتماعی جنازے

تہران میں بدھ کے روز ہلاک ہونے والوں کے اجتماعی جنازے میں ہزاروں افراد نے شرکت کی۔ سکیورٹی فورسز اور عام شہریوں کے جنازوں کے لیے دسیوں ہزار سوگوار تہران یونیورسٹی کے قریب سڑکوں پر جمع ہوئے۔

ایران کے سرکاری ٹیلی ویژن نے دعویٰ کیا کہ تہران یونیورسٹی میں 300 تابوت رکھے جانے تھے، تاہم ایسوسی ایٹڈ پریس کے نامہ نگاروں کے مطابق وہاں تقریباً 100 تابوت نظر آئے۔ تابوتوں کی تعداد میں اس فرق کی وجہ تاحال واضح نہیں ہو سکی۔

حکام کے مطابق گزشتہ چند دنوں سے جاری مظاہروں کے دوران 147 سکیورٹی اہلکار بھی ہلاک ہوئے، جن کی نمازِ جنازہ آج ادا کی جا رہی ہے۔

جنازوں میں شریک متعدد افراد کے ہاتھوں میں ایرانی پرچم، رہبرِ اعلیٰ آیت اللہ علی خامنہ ای کی تصاویر اور اپنے ہلاک ہونے والے رشتہ داروں کی تصویریں تھیں۔ ایرانی جھنڈوں سے ڈھکے تابوتوں میں سے کم از کم تین کو ٹرکوں کے پچھلے حصوں پر رکھا گیا تھا، جبکہ اس دوران شرکاء کی جانب سے امریکہ مخالف نعرے بھی لگائے گئے۔