ایران میں پاکستانی سفیر پر حملے کی خبر جھوٹی نکلی، وائرل ویڈیو آرمینیا کی پارلیمنٹ کی لڑائی کی نکلی

تہران( ڈیلی اردو) ایران میں پاکستان کے سفیر عمران احمد صدیقی پر مبینہ حملے کی اطلاعات بے بنیاد ثابت ہوگئیں، جبکہ سوشل میڈیا پر اس واقعے کے ثبوت کے طور پر شیئر کی جانے والی ویڈیو بھی ایران کی نہیں بلکہ آرمینیا کی پارلیمنٹ میں ہونے والی لڑائی کی نکلی ہے۔

تہران میں پاکستانی سفارتخانے نے یکم نومبر کو اپنے وضاحتی بیان میں سوشل میڈیا اور دیگر ذرائع پر گردش کرنے والی ان اطلاعات کی سختی سے تردید کرتے ہوئے انہیں بے بنیاد اور حقائق کے منافی قرار دیا۔ سفارتخانے کا کہنا تھا کہ پاکستانی سفیر عمران احمد صدیقی سے متعلق پھیلائی جانے والی خبروں میں کوئی صداقت نہیں۔

اس سے قبل سوشل میڈیا کے بعض اکاؤنٹس پر ایک ویڈیو شیئر کی گئی تھی جس میں ایک عمارت کے اندر متعدد افراد کو آپس میں لڑتے اور ہاتھا پائی کرتے دیکھا جا سکتا ہے۔ ویڈیو کے ساتھ دعویٰ کیا گیا کہ تہران میں ایک تقریب کے دوران پاکستانی سفیر کو بعض افراد نے تشدد کا نشانہ بنایا اور بعد ازاں انہیں علاج کے لیے اسپتال منتقل کر دیا گیا۔

تاہم بین الاقوامی فیکٹ چیک ادارے کی تحقیق کے مطابق یہ ویڈیو 29 اکتوبر 2026 کو آرمینیا کے دارالحکومت یریوان میں پارلیمنٹ کے اندر ہونے والی لڑائی کی ہے، جہاں حکومتی اور اپوزیشن ارکان کے درمیان تلخ کلامی کے بعد ہاتھا پائی شروع ہوگئی تھی۔ اس دوران بعض ارکان کے ایک دوسرے پر حملے اور پارلیمانی ایوان کے باہر راہداریوں تک جھگڑا پھیلنے کی اطلاعات بھی سامنے آئی تھیں۔

تحقیق میں واضح کیا گیا کہ پرانی ویڈیو کو غلط مقام اور واقعے سے منسوب کرکے پاکستانی سفیر پر حملے کی خبر کے طور پر پھیلایا گیا۔ سفیر کو اسپتال منتقل کیے جانے کے دعوے کی بھی کوئی معتبر تصدیق سامنے نہیں آئی۔

ایرانی ذرائع ابلاغ نے بھی پاکستانی سفارتخانے کی تردید کو رپورٹ کیا ہے۔ دوسری جانب پاکستانی سفیر کی جانب سے اس معاملے پر اپنے ذاتی سوشل میڈیا اکاؤنٹ سے کوئی الگ بیان سامنے آنے کی اطلاع نہیں ہے۔

عمران احمد صدیقی کو فروری 2026 میں ایران میں پاکستان کا سفیر مقرر کیا گیا تھا۔ اس سے قبل وہ بنگلہ دیش میں پاکستان کے سفیر کی حیثیت سے خدمات انجام دے چکے ہیں۔