ایران کا اسرائیل کے پانچ جاسوسوں کو گرفتار کرنے کا دعویٰ

تہران (ڈیلی اردو/ڈی پی اے/رائٹرز) ایرانی پولیس کے مطابق اس نے اسرائیل کی خفیہ ایجنسی سے منسلک جاسوسی کرنے والے ایک نیٹ ورک کے مبینہ لیڈر اور اس کے چار ساتھیوں کو گرفتار کر لیا ہے۔

ایرانی حکام نےگرفتار کیے جانے والے افراد کے نام ظاہر نہیں کیے لیکن یہ کہا کہ یہ افراد فوجی کارروائیوں اور تباہی پھیلانے سے متعلق تربیت شدہ ہیں۔ ایران کی نیم سرکاری نیوز ایجنسی آئی ایل این اے کو جاری ایک بیان میں ایران کی خفیہ ایجنسی نے کہا،” گرفتار شدہ پانچ افراد کو اسرائیل کی ایجنسی موساد کی جانب سے ایران بھر سے معلومات اکٹھا کرنے کے عوض مالی ادائیگیاں کیے جانے کا وعدہ کیا گیا تھا۔‘‘ اسرائیلی وزیر اعظم کے دفتر نے اس حوالے سے کوئی بیان نہیں دیا ہے۔

ایران اور اسرائیل پرانے حریف ہیں اور اس وقت ایران کے جوہری پروگرام کے حوالے سے دونوں ممالک میں کشیدگی عروج پر ہے۔ اسرائیل ایران پر اس کی سرزمین کے خلاف متحرک جنگجوؤں کی مدد کرنے کا الزام عائد کرتا ہے جبکہ ایران کا کہنا ہے کہ اسرائیل مئی میں ایران کےایک اہم افسر کی ہلاکت کا ذمہ دار ہے۔ اسرائیل ان الزامات کو نہ قبول کرتا ہے اور نہ ان کی تردید کرتا ہے۔

بدھ کو ایران کے وزیر برائے انٹیلجنس اسماعیل خطیب نے کہا کہ تہران نے اسرائیل کی تخریبی کارروائیوں کو ناکام بنا دیا ہے۔ انہوں نے کہا کہ ایرانی سیکورٹی فورسز نے گزشتہ چند مہینوں میں اسرائیل کے خلاف کامیابی کے ساتھ متعدد کارروائیاں کی ہیں۔ ایران کی سیکورٹی فورسز نے گزشتہ ہفتے کہا تھا کہ انہوں نے اسرائیل کے لیے کام کرنے والے ایجنٹوں کے ایک نیٹ ورک کو گرفتار کیا ہے،جو تخریب کاری کے لیے عراقی کردستان کے علاقے سے ایران میں داخل ہوئے تھے۔