ایران کے خلاف نئی کارروائی کی تیاری، اسرائیل میں فوجی آپشن پر غور تیز

تل ابیب(ڈیلی اردو) ایران اور اسرائیل کے درمیان دوبارہ بڑے فوجی تصادم کے امکانات کے پیش نظر اسرائیلی سکیورٹی اور دفاعی اداروں میں ہائی الرٹ برقرار ہے، جبکہ آئندہ کارروائی کی ممکنہ سمتوں پر غور کیا جا رہا ہے۔

امریکی ویب سائٹ ’’المونیتور‘‘ کی رپورٹ کے مطابق اسرائیلی انٹیلی جنس، سکیورٹی اور سفارتی ذرائع کا کہنا ہے کہ تل ابیب ایران کے خلاف آئندہ کسی بھی فوجی کارروائی کے لیے تیار ہے۔ رپورٹ میں دعویٰ کیا گیا ہے کہ اگر ایران کی جانب سے اسرائیل پر دوبارہ حملہ کیا گیا تو ایک بڑے اور شدید فوجی ردعمل کا امکان موجود ہے، جس میں امریکی حمایت بھی شامل ہوسکتی ہے۔

تین اسرائیلی سفارتی ذرائع کے مطابق ممکنہ اسرائیلی کارروائی میں ایران کے جوہری پروگرام سے متعلق باقی ماندہ تنصیبات کو بنیادی ہدف بنایا جاسکتا ہے۔ ذرائع کے مطابق ایرانی نظام کی اہم شخصیات یا ملک کے عمومی انفراسٹرکچر کو نشانہ بنانا بنیادی مقصد کے بجائے اضافی کارروائی تصور کیا جائے گا۔

رپورٹ کے مطابق اسرائیلی فضائیہ کو ہنگامی صورتحال میں فوری کارروائی کے لیے تیار رکھا گیا ہے، تاہم اسرائیلی سکیورٹی حلقوں میں اس بات پر اختلاف موجود ہے کہ ایران کے ساتھ دوبارہ براہ راست جنگ کب شروع ہوسکتی ہے۔ بعض حکام اسے قریب سمجھتے ہیں جبکہ دیگر کے خیال میں اس میں مزید وقت لگ سکتا ہے۔

دوسری جانب اسرائیلی سکیورٹی اداروں کے ایک حلقے کی رائے ہے کہ براہ راست جنگ کے بجائے ایران پر اقتصادی دباؤ اور سمندری پابندیوں میں اضافہ زیادہ مؤثر ثابت ہوسکتا ہے۔ اس نقطہ نظر کے مطابق امریکہ کی قیادت میں معاشی دباؤ اور ایران کی بیرونی تجارت کو محدود کرنے کی کوششیں جاری رہیں تو ممکنہ طور پر تہران کو اندرونی طور پر کمزور کیا جاسکتا ہے، جس سے بڑے فوجی تصادم سے بچنے کا راستہ نکل سکتا ہے۔