ایف اے ٹی ایف: پاکستان کو 2021 تک گرے لسٹ میں برقرار رکھنے کا اعلان

پیرس (ڈیلی اردو) فنانشل ایکشن ٹاسک فورس کے صدر مارکس پلیئر نے پریس کانفرنس کے دوران کہا کہ پاکستان فی الحال فروری 2021 تک گرے لسٹ میں رہے گا۔ پاکستان نے 27 میں سے 21 نکات پر عمل درآمد کیا ہے، پاکستان کو باقی 6 نکات پر بھی عمل درآمد کرنا پڑے گا۔

صدر ایف اے ٹی ایف کا کہنا تھا کہ پاکستان نے تمام ایکشن پوائنٹس پر پیش رفت دکھائی ہے اور پاکستان میں 27 نکات پر عمل درآمد کی پیشرفت اور اس کی خواہش پائی جاتی ہے، جب پاکستان تمام 27 نکات پرعمل درآمد یقینی بنالے گا تب ایک ٹیم پاکستان کا دروہ کرے گی۔

صدر ایف اے ٹی ایف نے کہا کہ پاکستان کے دورے کا مقصد زمینی حقائق کا جائزہ لینا ہوگا جب کہ اگلے اجلاس سے پہلے چیک کریں گے کہ پاکستان ان نکات پر موثر طریقے سے عملدرآمد کر رہا ہے یا نہیں جبکہ شمالی کوریا اور ایران کو بلیک لسٹ میں رکھا گیا ہے۔