ٹانک: گومل کے رہائشیوں نے دکاندار کے مبینہ اغوا کی کوشش ناکام بنا دی، مزاحمت کے دوران 2 دہشتگرد ہلاک

ٹانک(ڈیلی اردو) خیبرپختونخواہ کے شورش زدہ ضلع ٹانک کے علاقے گومل میں مقامی رہائشیوں نے ایک دکاندار کو مبینہ طور پر اغوا کرنے کی کوشش ناکام بناتے ہوئے مزاحمت کی، جس کے نتیجے میں دو دہشتگرد ہلاک ہوگئے۔

ابتدائی اطلاعات کے مطابق مسلح دہشتگردوں نے مقامی دکاندار کو اغوا کرنے کی کوشش کی، تاہم علاقے کے رہائشیوں نے فوری طور پر مداخلت کرتے ہوئے ان کا راستہ روک لیا اور مزاحمت کی۔ اس دوران دونوں حملہ آور ہلاک ہوگئے، جبکہ دکاندار کو اغوا ہونے سے بچا لیا گیا۔

یہ واقعہ ایسے وقت میں پیش آیا ہے جب ٹانک اور گردونواح میں شہریوں اور فلاحی سرگرمیوں سے وابستہ افراد کے تحفظ سے متعلق خدشات پائے جاتے ہیں۔ اس سے قبل علاقے میں پولیو مہم سے وابستہ چار اہلکاروں کے اغوا کی اطلاعات بھی سامنے آئی تھیں۔

واقعے کے حوالے سے تاحال حکام کی جانب سے باضابطہ تفصیلات، ہلاک ہونے والے دہشتگردوں کی شناخت اور واقعے کے دیگر پہلوؤں کی تصدیق سامنے نہیں آئی۔