باجوڑ: داعش حملوں میں سماجی کارکن سمیت 2 افراد ہلاک

واشنگٹن (ش ح ط) پاکستان کے شورش زدہ صوبہ  خیبر پختونخوا کے قبائلی ضلع باجوڑ کی تحصیل سلارزئی کے علاقے کوہی، ڈنڈو میں دہشت گردوں کی فائرنگ سے سماجی کارکن ملک ضیاء سلارزئی ہلاک ہو گئے۔

اطلاعات کے مطابق انہیں شدید زخمی حالت میں فوری طور پر ڈسٹرکٹ ہیڈکوارٹر ہسپتال خار منتقل کیا گیا، تاہم وہ زخموں کی تاب نہ لاتے ہوئے ہلاک ہو گئے۔ ذرائع کے مطابق حملہ آور موٹر سائیکل پر سوار تھے اور واردات کے بعد فرار ہو گئے۔

ملک ضیاء سلارزئی گزشتہ کئی برسوں سے سماجی و فلاحی سرگرمیوں میں سرگرم تھے۔ انہوں نے علاقے میں غریب اور نادار افراد کے لیے آواز بلند کی، جبکہ مساجد و مدارس کی تعمیر، دینی کتب کی فراہمی اور چندہ مہمات میں بھی نمایاں کردار ادا کیا۔

یاد رہے کہ چند سال قبل ان کے والد ملک فچئ کو بھی نامعلوم افراد نے فائرنگ کر کے ہلاک کر دیا تھا۔

ادھر تحصیل برنگ کے علاقے اصیل ترغاو میں ایک آئی ای ڈی دھماکے کے نتیجے میں سیدور ولد حبیب الرحمان سکنہ سیاہ مینہ بھی ہلاک ہو گئے۔ پولیس کے مطابق بارودی مواد سڑک کنارے نصب کیا گیا تھا جو گزرنے کے دوران پھٹ گیا۔

دونوں حملوں کی ذمہ داری داعش خراسان نے قبول کر لی ہے، جبکہ واقعات کے بعد علاقے میں شدید خوف و ہراس پایا جاتا ہے۔