باجوڑ میں آپریشن "سربکف" کے دوران 4 شہری ہلاک، 12 زخمی، مقامی آبادی محصور

خار (نمائندہ ڈیلی اردو) پاکستان کے صوبہ خیبر پختونخوا کے قبائلی ضلع باجوڑ میں شدت پسندوں کے خلاف جاری آپریشن "سربکف" کے پیش نظر 16 علاقوں میں تین روزہ کرفیو نافذ کر دیا گیا ہے۔ 

سرکاری نوٹیفکیشن کے مطابق متاثرہ علاقوں میں تحصیل لوئی ماموند، بادِ سیاہ، ترخو، اِرب، گاٹ، آگرا، خرچائی، دواگئی، کالان، لغارئی، کِٹکوٹ، گِلئی، نختر، زرئی، دمبرال، امانتا اور زگائی شامل ہیں۔

سیکیورٹی ذرائع کے مطابق آپریشن کے دوران 20 سے زائد شدت پسند ہلاک جبکہ 24 زخمی ہوئے ہیں، جب کہ درجنوں حملہ آور افغانستان فرار ہو گئے ہیں۔

تاہم مقامی ذرائع اور صحافیوں کا کہنا ہے کہ سیکیورٹی کارروائی کے دوران عام شہری بھی بری طرح متاثر ہو رہے ہیں۔ اب تک 4 شہری ہلاک اور 12 زخمی ہو چکے ہیں۔ 

مقامی صحافی بلال یاسر کے مطابق اپر ماموند کے بعض دیہات میں پہلی بار مسجدوں سے اذان کی صدائیں خاموش رہیں اور نماز کا اہتمام بھی نہ ہو سکا۔

آپریشن میں بھاری توپ خانہ، جنگی طیارے اور ہیلی کاپٹرز استعمال کیے جا رہے ہیں، جب کہ فضا مسلسل دھماکوں اور فائرنگ سے لرزتی رہی۔

مزید اطلاعات کا انتظار ہے۔