باجوڑ میں دھماکا، لشکر طیبہ کا رکن ہلاک، داعش نے ذمہ داری قبول کرلی

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع باجوڑ کی تحصیل ماموند کے علاقے زگہ ڈھیرئی سیوئی میں بم دھماکے کے نتیجے میں ایک شخص ہلاک ہو گیا۔ ہلاک ہونے والے کی شناخت نجیب اللہ ولد محمد زیر خان کے طور پر ہوئی ہے۔

ذرائع کے مطابق مقتول کا تعلق پاکستان میں کالعدم تنظیم جماعت الدعوۃ سے منسلک سیاسی جماعت ملی مسلم لیگ (ایم ایم ایل) سے تھا اور اس سے قبل وہ کالعدم لشکر طیبہ کا اہم رکن رہا ہے۔

پولیس کے مطابق دھماکے کے فوری بعد موقع پر پہنچ کر شواہد اکٹھے کر لیے گئے اور تحقیقات کا آغاز کر دیا گیا ہے۔ ڈی ایس پی نیاز محمد نے واقعے کی تصدیق کرتے ہوئے کہا کہ تحقیقات جاری ہیں۔

دوسری جانب عالمی شدت پسند تنظیم داعش خراسان نے اس دھماکے کی ذمہ داری قبول کر لی ہے۔