باجوڑ میں دہشت گردوں کی فائرنگ، ایک اور اہلکار ہلاک، مجموعی تعداد 16 ہوگئی

خار (ڈیلی اردو رپورٹ) پاکستان کے شورش زدہ صوبہ خیبرپختونخوا کے قبائلی ضلع باجوڑ میں دہشت گردوں کی فائرنگ سے ایک اور پولیس اہلکار ہلاک ہو گیا۔

پولیس کے مطابق تحصیل ماموند کے علاقے برخلوزو میں پولیس کانسٹیبل امتیاز کو اس وقت نشانہ بنایا گیا جب وہ چھٹی پر اپنے گھر موجود تھے۔ حملہ آور واردات کے بعد فرار ہونے میں کامیاب ہو گئے۔

واقعے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

گزشتہ روز بھی باجوڑ میں انسدادِ پولیو مہم کی سیکیورٹی پر تعینات دو پولیس اہلکار سید عزیز اور قادر جان ہلاک ہوئے تھے، جن کی ذمہ داری داعش خراسان نے قبول کرنے کا دعویٰ کیا ہے۔

حکام کے مطابق رواں سال باجوڑ میں ہلاک ہونے والے پولیس اہلکاروں کی تعداد 16 جبکہ صرف مئی کے مہینے میں ہلاک ہونے والے اہلکاروں کی تعداد 5 تک پہنچ گئی ہے۔