باجوڑ میں رکن اسمبلی کے حجرے پر دھماکا، ٹارگٹ کلنگ کے دو واقعات میں 2 افراد ہلاک

خار (نمائندہ ڈیلی اردو) پاکستان کے شورش زدہ صوبے خیبرپختونخوا کے قبائلی ضلع باجوڑ میں پاکستان تحریک انصاف (پی ٹی آئی) کے رکن صوبائی اسمبلی انور زیب خان کے حجرے میں بارودی مواد کا دھماکا ہوا، جس کے نتیجے میں ایک شہری زخمی ہو گیا۔

ڈی پی او باجوڑ وقاص رفیق کے مطابق، دھماکے کے وقت ایم پی اے انور زیب خان حجرے میں موجود نہیں تھے۔ زخمی ہونے والے شہری کی شناخت محمد زیر کے نام سے ہوئی ہے اور انہیں اسپتال منتقل کر دیا گیا ہے۔

وزیر اعلیٰ خیبرپختونخوا سہیل آفریدی نے دھماکے کی شدید مذمت کرتے ہوئے پولیس اور متعلقہ اداروں کو تحقیقات کی فوری ہدایت کی اور آئی جی پولیس سے واقعے کی رپورٹ طلب کر لی۔ 

انہوں نے زخمی شہری کو بہترین طبی سہولیات فراہم کرنے کی بھی ہدایت کی اور کہا کہ امن و امان قائم رکھنا حکومت کی اولین ترجیح ہے، اور اس قسم کے بزدلانہ حملے عوام کے حوصلے پست نہیں کر سکتے۔

ٹارگٹ کلنگ کے دو واقعات، دو افراد ہلاک

باجوڑ میں پی ٹی آئی رہنما کے حجرے پر دھماکے کے علاوہ دو مختلف ٹارگٹ کلنگ کے واقعات میں بھی دو افراد ہلاک ہو گئے۔

پہلا واقعہ تحصیل خار کے ہیڈ کوارٹر خار بازار کے علاقے کوز سر میں پیش آیا، جہاں نامعلوم افراد نے فائرنگ کر کے 24 سالہ جلال خان جان رحیم کو ہلاک کر دیا۔ ریسکیو ٹیم نے لاش اسپتال منتقل کی۔

دوسرا واقعہ تحصیل خار کے علاقے جار بانڈا ملکانہ میں پیش آیا، جہاں نامعلوم افراد کی فائرنگ سے قرآن پاک فروخت کرنے والے نذیر حسین ولد مولا بخش ہلاک ہو گئے۔ نذیر حسین کا تعلق خیبرپختونخوا کے ضلع اٹک سے تھا۔

پولیس نے دونوں واقعات کی تحقیقات شروع کر دی ہیں۔