باجوڑ میں ریموٹ کنٹرول دھماکا، میجر ثاقب سمیت 2 جوان شہید، 4 زخمی

خار (ڈیلی اردو) خیبرپختونخوا کے قبائلی ضلع باجوڑ کی تحصیل ماموند میں سڑک کنارے نصب ریموٹ کنٹرول بم دھماکہ سے میجر ثاقب سمیت 2 جوان شہید اور 4 زخمی ہو گئے۔

تفصیلات کے مطابق ضلع باجوڑ کی تحصیل ماموند میں گزشتہ روز سیکیورٹی اہلکار معمول کے مطابق پیٹرولنگ کر رہے تھے کہ نیاگا بانڈا کے علاقے میں 7 بجے کے قریب ان کی گاڑی سڑک کنارے نصب ریموٹ کنٹرول بم سے ٹکرائی۔ جس سے زور دار دھماکہ ہوا۔

دھماکے کے فوری بعد مقامی افراد جائے وقوع پر پہنچے اور ریسکیو کے کام کا آغاز کیا اور بعد ازاں سیکیورٹی فورسز اور باجوڑ لیویز کے اہلکار نے علاقے میں سرچ آپریشن کا آغاز کیا۔

نیوز ایجنسی ٹی این این کو حکام نے بتایا کہ دھماکے میں ایک میجر ثاقب اور ایک سپاہی معروف شہید ہوئے جبکہ 4 جوان زخمی ہوئے۔ ان کا کہنا تھا کہ ‘زخمیوں کی شناخت عارف، سہیل، عمران اور نیاز کے ناموں سے ہوئی جنہیں فوری پر ضلعی ہیڈ کوارٹر ہسپتال منتقل کردیا گیا۔

انہوں نے مزید بتایا کہ شہید اہلکاروں کی لاشوں کو ان کے آبائی علاقوں میں منتقل کردیا گیا ہے۔

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی۔