باجوڑ میں مسجد کے قریب دھماکا، ایک شخص ہلاک

خار (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع باجوڑ کی تحصیل برنگ کے علاقے ترغاؤ میں مسجد کے قریب آئی ای ڈی دھماکے کے نتیجے میں 60 سالہ شخص ہلاک ہو گیا۔ واقعے کے بعد علاقے میں خوف و ہراس پھیل گیا جبکہ سیکیورٹی فورسز اور پولیس نے تحقیقات شروع کر دی ہیں۔

پولیس کے مطابق ترغاؤ میں مسجد کے قریب ہونے والے دھماکے میں شہزادہ میاں ولد زر سید میاں ہلاک ہو گئے۔ دھماکے کے بعد مقامی افراد اور امدادی ٹیمیں موقع پر پہنچ گئیں اور ہلاک ہونے والے شخص کی لاش خار ہسپتال منتقل کر دی گئی۔

ڈی ایس پی سعید الرحمن نے بتایا کہ واقعے کی تحقیقات جاری ہیں اور ہلاک ہونے والے شخص کی شناخت شہزادہ میاں ولد زر سید میاں کے نام سے ہوئی ہے۔

انہوں نے کہا کہ دھماکے کے فوراً بعد سیکیورٹی اہلکاروں نے علاقے کو گھیرے میں لے لیا اور جائے وقوعہ سے شواہد اکٹھے کیے جا رہے ہیں۔ تفتیشی ٹیمیں دھماکے کی نوعیت اور اس میں ملوث عناصر کے تعین کے لیے مختلف پہلوؤں کا جائزہ لے رہی ہیں۔

ڈی ایس پی سعید الرحمن کے مطابق ترغاؤ برنگ میں مسجد کے قریب پیش آنے والے آئی ای ڈی دھماکے کی مکمل تحقیقات جاری ہیں اور واقعے سے متعلق مزید معلومات حاصل کی جا رہی ہیں۔

واقعے کے بعد علاقے میں سیکیورٹی سخت کر دی گئی ہے جبکہ قانون نافذ کرنے والے اداروں نے شہریوں سے مشکوک سرگرمیوں کی فوری اطلاع دینے کی اپیل کی ہے۔