باجوڑ میں ٹی ٹی پی کے خودکش حملے اور جھڑپوں میں 10 اہلکار ہلاک

واشنگٹن (ش ح ط) پاکستان کے شورش زدہ صوبہ خیبر پختونخوا کے قبائلی ضلع باجوڑ میں سکیورٹی فورسز پر تین مختلف مقامات پر ہونے والے دہشتگرد حملوں میں 10 اہلکار ہلاک جبکہ 30سے زائد زخمی ہو گئے۔

سرکاری ذرائع کے مطابق ضلع باجوڑ میں ایف سی کیمپ کے مرکزی گیٹ پر پہلے خودکش حملہ کیا گیا، جس کے بعد تقریباً 15 حملہ آور کیمپ میں داخل ہو گئے۔

ذرائع کا کہنا ہے کہ سکیورٹی فورسز نے فوری جوابی کارروائی کرتے ہوئے 6 حملہ آوروں کو موقع پر ہلاک کر دیا، تاہم شدید فائرنگ کے دوران 8 اہلکار بھی ہلاک ہوئے، جس کے بعد مزید حملہ آوروں کو اندر پہنچنے کا موقع ملا۔

حکام کے مطابق علاقے میں فائرنگ اور کلیئرنس آپریشن تاحال جاری ہے۔

اطلاعات کے مطابق مینا، عنایت کلے اور ماموند کے علاقوں میں بھی سکیورٹی فورسز کو نشانہ بنایا گیا، تاہم حکام کی جانب سے حملوں کی مکمل تفصیلات جاری نہیں کی گئیں۔

ذرائع کے مطابق مختلف حملوں میں مجموعی طور پر 10 اہلکار ہلاک ہوئے ہیں جبکہ متعدد زخمیوں کو قریبی ہسپتالوں میں منتقل کر دیا گیا ہے۔ 

حکام کا کہنا ہے کہ علاقے میں سرچ آپریشن جاری ہے اور حملہ آوروں کے خلاف کارروائی کی جا رہی ہے۔

دوسری جانب کالعدم تنظیم تحریک طالبان پاکستان نے باجوڑ میں ہونے والے خودکش حملے کی ذمہ داری قبول کر لی ہے۔