باجوڑ میں ڈرون حملہ، 3 بچے ہلاک، خواتین و بچوں سمیت 7 افراد زخمی

باجوڑ (نمائندہ ڈیلی اردو) پاکستان کے شورش زدہ صوبہ خیبر پختون خوا کے قبائلی ضلع باجوڑ کی تحصیل خار کے علاقے شینکوٹ میں ایک گھر پر مبینہ ڈرون حملے کے نتیجے میں تین بچے ہلاک جبکہ خواتین اور بچوں سمیت سات افراد زخمی ہو گئے۔

ذرائع کے مطابق حملہ سید ولی جان کے گھر پر ہوا، جس کے نتیجے میں ایک ہی خاندان کے متعدد افراد زخمی ہوئے۔ زخمیوں کو فوری طور پر قریبی طبی مراکز منتقل کیا گیا، جن میں سے بعض کی حالت تشویشناک بتائی جا رہی ہے۔

واقعے کے بعد علاقے میں کشیدگی پھیل گئی۔ اس سے قبل باجوڑ کے علاقے پھاٹک چوک میں مبینہ ڈرون حملوں اور بدامنی کے خلاف شہریوں نے احتجاجی مظاہرہ کیا، جس کے باعث باجوڑ–پشاور مرکزی شاہراہ ہر قسم کی ٹریفک کے لیے بند ہو گئی۔

شاہراہ کی بندش کے باعث دونوں اطراف گاڑیوں کی طویل قطاریں لگ گئیں اور مسافروں کو شدید مشکلات کا سامنا کرنا پڑا۔

مظاہرین نے مطالبہ کیا ہے کہ علاقے میں امن و امان کی صورتحال بہتر بنائی جائے، مبینہ ڈرون حملوں کی شفاف تحقیقات کی جائیں اور شہریوں کے جان و مال کے تحفظ کو یقینی بنایا جائے۔

انتظامیہ اور قانون نافذ کرنے والے ادارے صورتحال پر نظر رکھے ہوئے ہیں، تاہم آخری اطلاعات تک شاہراہ بدستور بند ہے۔