بدخشاں: طالبان گورنر کی فاتحہ کی تقریب میں دھماکا، 15 افراد ہلاک، 50 زخمی

کابل (ڈیلی اردو) افغانستان میں بم دھماکے میں ہلاک نائب گورنر کی فاتحہ کی تقریب کے دوران مسجد میں دھماکے سے 15 افراد ہلاک اور 50 زخمی ہوگئے۔

افغانستان کے صوبہ بدخشاں کے قائم مقام گورنر اور مستقل نائب گورنر دو روز قبل خودکش کار بم حملے میں ہلاک ہوگئے تھے۔

غیر ملکی خبر رساں ادارے کے مطابق بدخشاں صوبے کے قائم مقام گورنر مولوی نثار احمد احمدی کی فاتحہ خوانی کی تقریب مسجد میں جاری تھی کہ دھماکا ہو گیا۔

میڈیا رپورٹس کے مطابق دھماکے میں کم از کم 15 افراد ہلاک اور درجنوں زخمی ہوگئے، دھماکے کی نوعیت تاحال علم نہیں ہوسکا، ہلاک افراد کی تعداد میں اضافے کا خدشہ ہے۔

رپورٹ کے مطابق دھماکے میں بغلان پولیس کے سابق کمانڈر صفی اللہ صمیم بھی ہلاک ہوئے۔

اطلاعات و ثقافت کے سربراہ معاز الدین احمدی نے دھماکے کی تصدیق کی، اور بتایا کہ فیض آباد شہر کی مسجد نبوی میں دھماکا اس وقت ہوا جب دھماکے میں جاں بحق نائب گورنر نثار احمد کی فاتحہ خوانی ہورہی تھی۔

مقامی حکام نے دھماکے کی تصدیق کرتے ہوئے بتایا ہے کہ واقعے میں کئی ہلاکتیں ہوئیں ہیں تاہم اس کی صحیح تعداد نہیں بتائی گئی۔

بدخشاں کے قائم مقام گورنر سمیت 2 افراد منگل کو خودکش کار بم دھماکے میں ہلاک ہوگئے تھے، واقعے کی ذمہ داری داعش نے قبول کی تھی۔