بلوچستان: بی ایل اے نے ایئرپورٹ سکیورٹی فورس کے ڈپٹی ڈائریکٹر سمیت دو اہلکار اغوا کر لیے

واشنگٹن (ش ح ط) پاکستان کے شورش زدہ صوبہ بلوچستان کے ضلع قلات میں ایئرپورٹ سکیورٹی فورس (اے ایس ایف) کے ڈپٹی ڈائریکٹر و کمانڈنگ آفیسر محمد وسیم اور ان کے باورچی کو اغوا کر لیا گیا ہے۔

پولیس حکام اور سرکاری ذرائع نے واقعے کی تصدیق کرتے ہوئے بتایا ہے کہ اہلکار 20 مئی کو ژوب سے کوئٹہ اور پھر کوئٹہ سے کراچی روانہ ہوئے تھے۔ قلات کے علاقے میں نامعلوم مسلح افراد نے ان کی گاڑی کو روک کر انہیں اغوا کر لیا، جبکہ گاڑی میں موجود ایک مسافر اور ڈرائیور کو چھوڑ دیا گیا۔

سرکاری ذرائع کے مطابق مغوی اہلکاروں کی بازیابی کے لیے کوششیں جاری ہیں، تاہم اس حوالے سے تاحال کوئی باضابطہ سرکاری بیان جاری نہیں کیا گیا۔

دوسری جانب کالعدم تنظیم بلوچ لبریشن آرمی (بی ایل اے) نے “ڈیلی اردو کو ای میل” کرتے ہوئے دعویٰ کیا ہے کہ اس نے ایئرپورٹ سکیورٹی فورس کے ڈپٹی ڈائریکٹر محمد وسیم کو قلات کے مرکزی شاہراہ پر ایک کارروائی کے دوران حراست میں لیا۔ 

تنظیم کے ترجمان جیئند بلوچ کے مطابق یہ کارروائی ان کے انٹیلی جنس ونگ “زراب” کی فراہم کردہ معلومات کی بنیاد پر کی گئی، جبکہ مزید تفصیلات جلد جاری کرنے کا اعلان کیا گیا ہے۔

بلوچستان میں حالیہ دنوں کے دوران شاہراہوں پر اغوا اور حملوں کے واقعات میں اضافہ دیکھا گیا ہے، جن میں گزشتہ روز زیارت اور اس سے قبل مستونگ میں بھی اسی نوعیت کے واقعات رپورٹ ہوئے ہیں۔