بلوچستان: خاران میں سکیورٹی فورسز کا آپریشن، 12 شدت پسند ہلاک

اسلام آباد (ڈیلی اردو) پاکستان کے شورش زدہ صوبے بلوچستان کے ضلع خاران میں سکیورٹی فورسز نے ایک آپریشن کے دوران ’فتنہ الہندوستان‘ سے تعلق رکھنے والے 12 شدت پسندوں کو ہلاک کر دیا ہے، جبکہ علاقے میں آپریشن جاری ہے۔

پاکستانی فوج کے شعبہ تعلقات عامہ آئی ایس پی آر نے اپنے بیان میں کہا ہے کہ خاران میں 15 سے 20 شدت پسندوں نے پولیس سٹیشن، نیشنل بینک اور حبیب بینک کی عمارتوں پر حملہ کیا۔ حملہ آوروں نے بینکوں سے 34 لاکھ روپے کی ڈکیتی بھی کی۔

آئی ایس پی آر کے مطابق سکیورٹی فورسز نے جوابی کارروائی میں 12 شدت پسندوں کو ہلاک کیا جبکہ دہشت گردوں کی جانب سے پولیس سٹیشن میں لوگوں کو یرغمال بنانے کی کوشش کو بھی ناکام بنایا گیا۔

آئی ایس پی آر نے مزید کہا کہ علاقے میں آپریشن جاری ہے اور سکیورٹی فورسز نے علاقے کو کلیئر کرنے کے لیے کارروائیاں شروع کر رکھی ہیں۔

پاکستان کی وزارت داخلہ نے صوبہ بلوچستان میں دہشت گردی میں ملوث تمام گروہوں کو ’فتنہ الہندوستان‘ کا نام دے رکھا ہے۔ پاکستانی حکومت ان گروہوں پر بھارت کو پشت پناہی کا الزام لگاتی ہے، تاہم نئی دہلی ماضی میں ایسے الزامات کی تردید کر چکا ہے۔