بلوچستان: خاران میں مسلح افراد کی فائرنگ سے ایس ایچ او ہلاک، کمشنر کے بیٹے کی بازیابی

کوئٹہ ((ڈیلی اردو/بی بی سی) پاکستان کے شورش زدہ صوبے بلوچستان کے ضلع خاران میں نامعلوم مسلح افراد کی فائرنگ سے پولیس کے ایک ایس ایچ او ہلاک ہوگئے ہیں۔

خاران پولیس کے ایک اہلکار نے برطانوی خبر رساں ادارے بی بی سی کو بتایا کہ خاران شہر کے ایس ایچ او محمد قاسم بلوچ کو جمعے کی شب ڈی ایچ کیو اسپتال کے قریب فائرنگ کر کے ہلاک کیا گیا۔

پولیس اہلکار داد کریم کے مطابق ایس ایچ او محمد قاسم دیگر اہلکاروں کے ہمراہ گاڑیوں کی سنیپ چیکنگ میں مصروف تھے کہ ایک سفید سرف گاڑی میں سوار نامعلوم مسلح افراد موقع پر پہنچے۔

سینیئر پولیس افسر کے مطابق، جو نام ظاہر نہیں کرنا چاہتے تھے، ’حملہ آوروں نے پہلے ایس ایچ او کے چار گن مینز کو قابو کرلیا اور انھیں اغوا کرنے کی کوشش کی۔ تاہم مزاحمت پر فائرنگ کر دی گئی، جس کے نتیجے میں وہ موقع پر ہی ہلاک ہوگئے۔‘

پولیس نے علاقے کو گھیرے میں لے کر ملزمان کی تلاش شروع کر دی ہے۔

یہ بلوچستان میں پولیس اہلکاروں پر دو روز کے دوران دوسرا حملہ ہے۔ جمعرات کو ضلع سوراب میں بلوچستان کانسٹیبلری کے اہلکاروں پر حملے میں ایک حوالدار ہلاک ہوا تھا۔

خاران واقعے کے خلاف آل پارٹیز خاران نے کل شہر میں شٹر ڈاؤن ہڑتال کی کال دی ہے۔

زیارت: اغوا کیے گئے اسسٹنٹ کمشنر کے بیٹے کی بازیابی

ادھر بلوچستان کے ضلع زیارت سے اغوا کیے گئے اسسٹنٹ کمشنر کے بیٹے مستنصر بلال کو بازیاب کرا لیا گیا ہے۔

کمشنر سبی ڈویژن اسداللہ فیض اور مغوی افسر کے قریبی رشتہ داروں نے ان کی بازیابی کی تصدیق کی ہے۔

یاد رہے کہ رواں سال 10 اگست کو اسسٹنٹ کمشنر زیارت افضل باقی اور ان کے بیٹے کو ضلع زیارت کے سیاحتی مقام زیزری سے نامعلوم مسلح افراد نے اغوا کیا تھا۔ اغوا کاروں نے ان کے ڈرائیور اور گن مین کو چھوڑ دیا تھا جبکہ گاڑی کو نذرِ آتش کر دیا گیا تھا۔

ذرائع کے مطابق مستنصر بلال گزشتہ شب بازیاب ہوئے، تاہم ابھی یہ واضح نہیں کہ ان کی رہائی کس طرح ممکن ہوئی۔ اہلِ خانہ کا کہنا ہے کہ انھیں تاحال گھر نہیں پہنچایا گیا۔

چند روز قبل سوشل میڈیا پر اسسٹنٹ کمشنر کے قتل سے متعلق اطلاعات سامنے آئی تھیں جن کی حکام نے تردید کی تھی۔