بلوچستان: خضدار میں فورسز کا آپریشن، بی ایل اے کے 14 دہشت گرد ہلاک

راولپنڈی (ک م) پاکستان کے شورش زدہ صوبہ بلوچستان کے ضلع خضدار کے علاقے نال میں سیکیورٹی فورسز نے انٹیلی جنس بنیاد پر آپریشن کرتے ہوئے کالعدم بلوچ لبریشن آرمی (بی ایل اے) کے 14 دہشت گردوں کو ہلاک کر دیا، جبکہ فائرنگ کے تبادلے میں ایک فوجی اہلکار ہلاک ہو گیا۔

پاکستانی فوج کے شعبہ تعلقات عامہ (آئی ایس پی آر) کے مطابق یہ کارروائی دہشت گردوں کی موجودگی کی اطلاع پر کی گئی۔ بیان میں کہا گیا کہ دہشت گرد پولیس اسٹیشن اور بینکوں پر حملوں کی منصوبہ بندی کر رہے تھے، تاہم بروقت کارروائی کے ذریعے ان کے عزائم ناکام بنا دیے گئے۔

آئی ایس پی آر کے مطابق آپریشن کے دوران دہشت گردوں کی نقل و حرکت کو مؤثر طور پر روکا گیا اور شدید فائرنگ کے تبادلے میں انہیں نشانہ بنایا گیا۔

بیان میں مزید بتایا گیا کہ دہشت گردوں کے زیر استعمال 4 گاڑیاں اور آئی ای ڈیز بھی تباہ کر دی گئیں، جبکہ ہلاک اہلکار کی شناخت لانس حوالدار محمد عباس کے طور پر ہوئی ہے۔

سیکیورٹی فورسز کے مطابق علاقے میں کلیئرنس آپریشن جاری ہے تاکہ کسی بھی باقی ماندہ دہشت گرد کو ختم کیا جا سکے۔