بلوچستان: دکی میں دو افراد کی گولیوں سے چھلنی لاشیں برآمد

کوئٹہ (نمائندہ ڈیلی اردو)پاکستان کے شورش زدہ صوبے بلوچستان کے ضلع دکی کی تحصیل لونی کے علاقے کلی بختیار خان سے دو افراد کی لاشیں برآمد ہوئی ہیں، پولیس نے تصدیق کی ہے۔

پولیس کے مطابق دونوں افراد کے جسموں پر گولیوں کے متعدد نشانات پائے گئے ہیں، جس سے ظاہر ہوتا ہے کہ انہیں فائرنگ کر کے ہلاک کیا گیا۔

حکام کا کہنا ہے کہ ہلاک ہونے والے افراد کی شناخت لعل خان ولد رحیم خان، سکنہ چھپر رکنی، اور موسیٰ خان ولد میرو، سکنہ پژہ کوہلو کے نام سے ہوئی ہے۔

پولیس نے لاشوں کو تحویل میں لے کر قریبی اسپتال منتقل کر دیا ہے جہاں ضروری کارروائی کے بعد انہیں ورثا کے حوالے کیا جائے گا۔

واقعے کے بعد سیکیورٹی فورسز نے علاقے کو گھیرے میں لے کر شواہد اکٹھے کرنے اور ملزمان کی تلاش کے لیے سرچ آپریشن شروع کر دیا ہے، تاہم فوری طور پر واقعے کی نوعیت اور محرکات کے بارے میں کچھ نہیں کہا گیا۔

پولیس کا کہنا ہے کہ واقعے کی مزید تحقیقات جاری ہیں۔