شمالی وزیرستان میں سیکیورٹی فورسز کا انٹیلی جنس آپریشن، 7 دہشتگرد ہلاک

شمالی وزیرستان(ڈیلی اردو) خیبرپختونخوا کے شورش زدہ قبائلی ضلع شمالی وزیرستان میں سیکیورٹی فورسز نے انٹیلی جنس معلومات کی بنیاد پر کارروائی کرتے ہوئے 7 دہشتگردوں کو ہلاک کردیا، جبکہ کارروائی کے دوران دہشتگردوں کے ٹھکانے بھی تباہ کیے گئے۔

سیکیورٹی ذرائع کے مطابق انٹیلی جنس بیسڈ آپریشن شمالی وزیرستان کے علاقے عیدک میں کیا گیا، جہاں سیکیورٹی فورسز نے دہشتگردوں کی موجودگی کی اطلاع پر کارروائی کی۔ آپریشن کے دوران فورسز اور دہشتگردوں کے درمیان فائرنگ کا تبادلہ ہوا، جس میں 7 دہشتگرد ہلاک ہوئے۔

ذرائع کا کہنا ہے کہ کارروائی کے دوران دہشتگردوں کے زیر استعمال ٹھکانوں کو بھی نشانہ بنایا گیا اور انہیں تباہ کردیا گیا۔ سیکیورٹی فورسز نے علاقے میں دہشتگردوں کی نقل و حرکت روکنے اور ان کے نیٹ ورک کے خاتمے کے لیے سرچ اینڈ کلیئرنس کارروائیاں بھی کیں۔

سیکیورٹی ذرائع کے مطابق فورسز نے دہشتگردوں کے تعاقب میں مؤثر کارروائی کرتے ہوئے انہیں ہلاک کیا، جبکہ علاقے میں دہشتگرد عناصر کے لیے محفوظ ٹھکانوں اور نقل و حرکت کی گنجائش محدود کردی گئی ہے۔

سیکیورٹی حکام کا کہنا ہے کہ خیبرپختونخوا میں دہشتگردی کے خاتمے کے لیے انٹیلی جنس بنیادوں پر کارروائیاں جاری رکھی جائیں گی، جبکہ دہشتگردوں کے سہولت کاروں اور معاون نیٹ ورک کے خلاف بھی اقدامات کیے جا رہے ہیں۔

حکام کے مطابق سیکیورٹی فورسز ملک میں پائیدار امن کے قیام اور دہشتگردی کے مکمل خاتمے کے عزم کے تحت کارروائیاں جاری رکھے ہوئے ہیں۔