بلوچستان: دکی میں دہشت گردوں کا پولیس تھانے پر حملہ، ایک اہلکار ہلاک، 3 زخمی

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع دکی میں دہشت گردوں نے پولیس تھانے پر حملہ کر دیا، جس کے نتیجے میں ایک پولیس اہلکار ہلاک جبکہ 3 اہلکار زخمی ہو گئے۔

مقامی ذرائع کے مطابق نامعلوم مسلح دہشت گردوں نے منگل کی شب بھاری ہتھیاروں سے تھانے کو نشانہ بنایا۔ حملے میں پولیس اہلکار سید حسن زرکون ہلاک ہو گئے جبکہ محمد ولی زرکون، بلوچ خان لونی اور ایک اور اہلکار زخمی ہوئے۔

پولیس ذرائع کے مطابق تھانے میں تعینات اہلکاروں نے فوری جوابی کارروائی کی، جس کے بعد حملہ آور فرار ہو گئے۔

واقعے کی اطلاع ملتے ہی ایس پی دکی منصور احمد بزدار کی قیادت میں پولیس، اے ٹی ایف اور ایف سی کی کوئک ریسپانس فورس موقع پر پہنچ گئی۔ زخمی اہلکاروں کو ہسپتال منتقل کر دیا گیا، جہاں ان کی حالت خطرے سے باہر بتائی جا رہی ہے۔

سکیورٹی فورسز نے علاقے کا محاصرہ کر کے سرچ آپریشن شروع کر دیا ہے جبکہ حملہ آوروں کی تلاش جاری ہے۔