بلوچستان: دہشتگردانہ حملوں میں 4 افراد ہلاک

کوئٹہ (نمائندہ ڈیلی اردو) پاکستان کے شورش زدہ صوبے بلوچستان میں مختلف واقعات میں مجموعی طور پر چار افراد ہلاک ہو گئے۔ ضلع قلات کے علاقے منگوچر کی پہاڑی رینج بدرنگ میں دو افراد مردہ حالت میں ملے، جنہیں فائرنگ کرکے ہلاک کیا گیا تھا۔

علاقہ مکینوں کی اطلاع پر پولیس موقع پر پہنچی، علاقے کو گھیرے میں لے کر لاشوں کو ڈسٹرکٹ ہسپتال منتقل کیا گیا۔ 

ہسپتال کے ایک اہلکار کے مطابق ہلاکت کی وجہ جسم پر متعدد گولیوں کے زخم تھے۔ بعدازاں مقتولین کی شناخت شیخری گاؤں کے رہائشی قطب علی اور ضلع قلات کے جوہان علاقے سے تعلق رکھنے والے علی محمد کے طور پر ہوئی۔

ادھر حب میں الگ الگ مسلح حملوں میں ایک خاتون اور ایک مرد ہلاک ہو گئے۔ 

پولیس کے مطابق نامعلوم افراد نے ایک خاتون پر فائرنگ کی، جس سے وہ موقع پر ہی ہلاک ہو گئیں۔ اسی طرح جیم کالونی میں ایک نوجوان کو بھی گولی مار کر ہلاک کیا گیا۔ دونوں مقتولین کی شناخت فوری طور پر نہیں ہو سکی۔

واضح رہے کہ گزشتہ روز زیارت میں سیکیورٹی فورسز نے ایک مشتبہ دہشت گرد حملہ ناکام بنایا اور 5 مسلح افراد کو گرفتار کیا۔ یہ گرفتاریاں زیارت ٹاؤن کے مضافات میں قائم چیک پوسٹ اسپیرہ راغلا پر عمل میں آئیں۔

زیارت کے ڈپٹی کمشنر ریاض داوڑ نے تصدیق کی کہ مشتبہ افراد افغانستان کے صوبہ قندھار سے تعلق رکھتے تھے۔ ان سے قبضے میں 11 دستی بم، 3 سب مشین گنز، 2 ایم-4 رائفلیں، ایک گرینیڈ لانچر، بھاری مقدار میں گولا بارود، کمیونیکیشن کا سامان، ایک موٹرسائیکل اور کالعدم تحریک طالبان پاکستان (ٹی ٹی پی) سے متعلق لٹریچر برآمد ہوا۔

بلوچستان کے وزیراعلیٰ ثنا اللہ بگٹی نے سیکیورٹی فورسز کی کارروائی کو سراہا اور کہا کہ “سیکیورٹی فورسز کی بروقت کارروائی اور بلوچستان کے عوام کے تحفظ کے لیے ان کی قربانیاں ہمارا فخر ہیں۔”