بلوچستان: قلات اور پنجگور میں دہشت گردانہ حملوں میں سات افراد ہلاک

کوئٹہ (ڈیلی اردو) پاکستان کے شورش زدہ صوبے بلوچستان کے اضلاع قلات اور پنجگور میں دہشت گردانہ حملوں کے نتیجے میں سات افراد ہلاک ہوگئے ہیں۔ ہلاک ہونے والوں میں ایک قبائلی رہنما اور اس کا بھائی بھی شامل ہیں۔

منگیچر میں دہشت گردوں کی فائرنگ سے چار افراد ہلاک

ضلع قلات کے علاقے منگیچر میں نامعلوم دہشت گردوں نے گاؤں سربند میں حملہ کر کے قبائلی رہنما شاکر سعداللہ سمیت چار افراد کو ہلاک کر دیا۔

ہلاک ہونے والوں میں قبائلی رہنما کا بھائی خیراللہ بھی شامل ہے۔

لیویز حکام کے مطابق دہشت گرد موٹر سائیکلوں پر آئے اور کارروائی کے بعد فرار ہونے میں کامیاب ہو گئے۔

ابتدائی طور پر واقعے کو ٹارگٹڈ دہشت گردانہ حملہ قرار دیا جا رہا ہے، تاہم مزید تحقیقات جاری ہیں۔

قلات میں ایک اور شخص دہشت گردانہ کارروائی کا نشانہ

اسی روز ضلع قلات کے علاقے محمد تاوہ سے ایک شخص کی لاش ملی، جس کی شناخت سمیع اللہ نیچاری کے نام سے ہوئی ہے۔

پولیس کے مطابق انھیں بھی نامعلوم دہشت گردوں نے فائرنگ کر کے ہلاک کیا۔

لاش کو ضروری کارروائی کے بعد ورثاء کے حوالے کر دیا گیا ہے۔

پنجگور میں دہشت گردوں کی فائرنگ سے دو افراد ہلاک

گزشتہ شب ضلع پنجگور کے علاقے شاپاتان میں نامعلوم دہشت گردوں نے فائرنگ کر کے محمد ظفر اور نعیم نامی دو افراد کو ہلاک کر دیا۔ حملے کے بعد دہشت گرد فرار ہو گئے جبکہ سیکیورٹی فورسز نے علاقے میں سرچ آپریشن شروع کر دیا ہے۔

پس منظر

بلوچستان میں ریاست مخالف مسلح گروہوں اور شدت پسند تنظیموں کی سرگرمیوں کے باعث دہشت گردانہ حملوں میں اضافہ دیکھا جا رہا ہے۔

تاہم ان تازہ واقعات کی ذمہ داری کسی گروہ نے تاحال قبول نہیں کی۔