بلوچستان: قلات سے 4 افراد کی گولیوں سے چھلنی لاشیں برآمد

واشنگٹن (ش ح ط) پاکستان کے شورش زدہ صوبے بلوچستان کے ضلع قلات میں جمعرات کے روز فائرنگ کے دو الگ واقعات میں مزید چار افراد کی گولیوں سے چھلنی لاشیں ملی ہیں، جس کے بعد صوبے میں ٹارگٹ کلنگ اور پرتشدد واقعات میں اضافہ تشویش کا باعث بن گیا ہے۔

ڈیلی اردو کے مطابق قلات کے علاقے بدارنگ اور ضلع خضدار کی تحصیل زہری میں کوئٹہ—کراچی نیشنل ہائی وے کے قریب سے چار لاشیں برآمد ہوئیں۔ مقامی رہائشیوں کی اطلاع پر پولیس موقع پر پہنچی اور لاشوں کو ضلعی اسپتال منتقل کیا۔

پولیس کے مطابق تین لاشیں سڑک کے کنارے پھینکی گئی تھیں۔ نامعلوم حملہ آوروں نے تینوں افراد کو فائرنگ کر کے ہلاک کیا۔ ابتدائی تحقیقات کے مطابق یہ تینوں افراد لہڑی قبیلے سے تعلق رکھتے تھے اور آپس میں کزن تھے۔

ایک اور گولیوں سے چھلنی لاش خضدار کے علاقے سموآنی، زہری تحصیل سے ملی۔ پولیس نے لاش قبضے میں لے کر ضابطے کی کارروائی مکمل کی اور تحقیقات شروع کر دی ہیں۔

صوبے میں لاشوں کی برآمدگی کے سلسلے میں تیزی

گزشتہ ماہ سے بلوچستان کے مختلف اضلاع میں لاشیں ملنے کے واقعات میں اضافہ دیکھنے میں آ رہا ہے۔

28 اکتوبر کو ضلع گوادر کی تحصیل تُمپ سے 3 لاشیں ملی تھیں، جن میں ایک حال ہی میں شادی شدہ نوجوان عمران نادِل بھی شامل تھا۔

مقامی افراد کے مطابق عمران کو تاوان کے لیے اغوا کیا گیا تھا اور رقم نہ ملنے پر قتل کر دیا گیا۔

ضلع کیچ میں بھی تین افراد کی لاشیں ملنے کی تصدیق ہوئی ہے، جن میں سے دو کی شناخت ابو بکر اور طاہر احمد کے ناموں سے ہوئی۔ دونوں کئی ہفتوں سے لاپتا تھے۔

میڈیکو لیگل کارروائی کے بعد لاشیں ورثاء کے حوالے کر دی گئی ہیں، جبکہ پولیس تمام واقعات کی مشترکہ طور پر تفتیش کر رہی ہے۔

پولیس اہلکار کا کہنا تھا کہ ان افراد اور ان کی ہلاکت کے محرکات کے بارے میں تحقیقات شروع کردی گئی ہیں۔