بلوچستان میں بھارتی پراکسیز کی ہر حرکت پر پاکستانی فوج کا فیصلہ کن جواب یقینی، فیلڈ مارشل عاصم منیر

راولپنڈی (ک م) پاکستان کے چیف آف ڈیفینس فورسز اور آرمی چیف فیلڈ مارشل سید عاصم منیر نے بلوچستان سے متعلق 18ویں قومی ورکشاپ کے شرکاء سے خطاب کرتے ہوئے واضح کیا ہے کہ پاکستان کی علاقائی سالمیت کی کسی بھی براہِ راست یا بالواسطہ خلاف ورزی پر سخت اور فیصلہ کن جواب دیا جائے گا۔

آئی ایس پی آر کے مطابق فیلڈ مارشل عاصم منیر نے کہا کہ بھارتی اسپانسرڈ پراکسیز بلوچستان میں تشدد، بے امنی اور منفی پروپیگنڈا پھیلا رہی ہیں اور صوبے کی ترقی میں رکاوٹ ڈالنے کی کوششیں کر رہی ہیں۔ انہوں نے اس بات پر زور دیا کہ پاک فوج شہریوں کی جان و مال کے تحفظ کے لیے پرعزم ہے اور سکیورٹی فورسز بھارتی حمایت یافتہ عناصر کے عزائم کو سخت کارروائیوں سے ناکام بنائیں گی۔

انہوں نے بلوچستان کی اسٹریٹجک اہمیت، عوام کی حب الوطنی اور ترقیاتی منصوبوں پر وفاقی و صوبائی حکومتوں کے عملدرآمد کی تعریف بھی کی۔ سیشن کے اختتام پر سوال و جواب کی نشست میں شرکاء کے سوالات کے جوابات دیے گئے۔