بلوچستان میں دہشت گرد حملے، خاتون پولیس اہلکار سمیت 3 اہلکار ہلاک، 8 زخمی

کوئٹہ (ڈیلی اردو) پاکستان کے شورش زدہ صوبے بلوچستان کے مختلف علاقوں میں دہشت گردوں کے حملوں میں خاتون پولیس اہلکار سمیت 3 اہلکار ہلاک جبکہ 2 افسران سمیت 8 اہلکار زخمی ہو گئے۔

خضدار کے علاقے باجوئی میں پولیس اور دہشت گردوں کے درمیان فائرنگ کے تبادلے میں صوبے کی پہلی خاتون کانسٹیبل ملک ناز بی بی اور ہیڈ کانسٹیبل سمیع اللہ ہلاک ہو گئے، جبکہ ایڈیشنل ایس ایچ او محمد ابراہیم اور کانسٹیبل نجیب الرحمن زخمی ہوئے۔ 

پولیس کے مطابق کارروائی سولر پلیٹوں کی چوری کے واقعے پر چھاپے کے دوران کی گئی۔

دوسری جانب دشت میں سی ٹی ڈی اور پولیس کے مشترکہ ٹارگٹڈ آپریشن کے دوران دہشت گردوں نے شدید فائرنگ اور دستی بموں سے حملہ کیا، جس کے نتیجے میں ہیڈ کانسٹیبل رحمت اللہ ہلاک ہو گئے، جبکہ سی ٹی ڈی کے سب انسپکٹر جاوید گل سمیت 6 اہلکار شدید زخمی ہو گئے۔

زخمیوں میں کانسٹیبل نیاز احمد، اے ایس آئی وقار احمد، ہیڈ کانسٹیبل نور اللہ، کانسٹیبل عبدالعلیم اور کانسٹیبل تاج محمد شامل ہیں۔ 

پولیس اور سکیورٹی فورسز نے علاقے کو گھیرے میں لے کر مزید کارروائی شروع کر دی ہے۔