بلوچستان: نصیر آباد میں پولیس گاڑی پر دستی بم حملہ، 2 اہلکاروں سمیت 13 افراد زخمی

کوئٹہ (ڈیلی اردو )پاکستان کے شورش زدہ صوبے بلوچستان کے ضلع نصیر آباد میں دستی بم کے حملے میں دو پولیس اہلکاروں سمیت 13 افراد زخمی ہو گئے ہیں۔

بلوچستان کے علاقے نصیر آباد میں قومی شاہراہ پر پولیس موبائل پر دستی بم حملہ کیا گیا ہے، جس کے نتیجے میں 2 پولیس اہلکاروں سمیت 13 افراد زخمی ہوگئے۔

پولیس حکام کے مطابق نصیر آباد میں قومی شاہراہ پر دوران گشت پولیس موبائل پر بلوچ بلوچ عسکریت پسندوں نے دستی بم سے حملہ کر دیا، حملے کے فوری بعد پولیس اور قانون نافذ کرنے والے اداروں نے علاقے کو گھیرے میں لے کر شواہد اکٹھے کرنے شروع کر دیے جبکہ علاقے میں سیکیورٹی مزید سخت کر دی گئی ہے۔

میڈیکل سپرنٹنڈنٹ ( ایم ایس ) سول ہسپتال ڈیرہ مراد جمالی ڈاکٹر نصیر احمد عمرانی نے مقامی صحافیوں کو بتایا کہ حملے میں 2 پولیس اہلکاروں سمیت 13 افراد زخمیوں کو سول ہسپتال لایا گیا ہے۔

انہوں نے بتایا کہ زخمیوں میں ایک خاتون اور دو بچے بھی شامل ہیں تمام زخمیوں کو طبی امداد فراہم کی جا رہی ہے۔

پولیس حکام کے مطابق واقعے کی تحقیقات شروع کردی گئی ہیں۔

اس سے قبل ضلع نصیر آباد کے علاقے نوتال میں کوئٹہ سے پشاور جانے والی جعفر ایکسپریس پر بھی بلوچ عسکریت پسندوں نے حملہ کیا۔

اس علاقے کے پولیس کے ایس ایچ او بشیر احمد نے بتایا کہ حملہ چھوٹے اور بڑے ہتھیاروں سے کیا گیا۔

ان کا کہنا تھا کہ ٹرین کی سیکورٹی پر مامور اہلکاروں نے جوابی کاروائی کی جس سے حملہ آور فرار ہوگئے۔ پولیس آفیسر کا کہنا تھا کہ اس واقعے میں کوئی جانی نقصان نہیں ہوا۔

اس حملے کی ذمہ داری کالعدم بلوچ ریپبلکن گارڈز نے قبول کی ہے۔