بلوچستان: نوشکی میں معروف ادیب پروفیسر غمخوار حیات قاتلانہ حملے میں ہلاک

کوئٹہ (ڈیلی اردو/بی بی سی) پاکستان کے شورش زدہ صوبہ بلوچستان کے ضلع نوشکی میں نامعلوم مسلح افراد کے حملے میں معروف براہوئی شاعر، ادیب اور استاد پروفیسر غمخوار حیات ہلاک ہو گئے ہیں۔

پولیس حکام کے مطابق واقعہ نوشکی شہر کے نواحی علاقے کلی مینگل کے قریب پیش آیا، جہاں نامعلوم حملہ آوروں نے انہیں نشانہ بنایا۔

نوشکی پولیس کے ایس پی سلیم شاہوانی نے بتایا کہ پروفیسر غمخوار حیات حملے میں جانبر نہ ہو سکے۔ ان کی لاش کو پوسٹ مارٹم کے لیے ٹیچنگ ہسپتال نوشکی منتقل کر دیا گیا ہے۔

پولیس کا کہنا ہے کہ واقعے کے محرکات فوری طور پر معلوم نہیں ہو سکے اور اس حوالے سے تحقیقات شروع کر دی گئی ہیں۔

وزیراعلیٰ بلوچستان کے معاون برائے میڈیا و سیاسی امور شاہد رند نے واقعے کی مذمت کرتے ہوئے کہا کہ پروفیسر غمخوار حیات کا قتل صوبے کی علمی، ادبی اور فکری اقدار پر حملہ ہے۔ 

انہوں نے کہا کہ واقعے میں ملوث افراد کو قانون کے کٹہرے میں لایا جائے گا اور حکومت دہشت گردی کے خاتمے کے لیے پرعزم ہے۔

پروفیسر غمخوار حیات کا اصل نام محمد خان تھا، تاہم وہ اپنے قلمی نام سے ادبی دنیا میں معروف تھے۔ ان کا تعلق ضلع نوشکی سے تھا اور وہ مقامی سیاسی کارکن عبدالمجید ساسولی کے صاحبزادے تھے۔

اعلیٰ تعلیم حاصل کرنے کے بعد وہ 2014 میں براہوی زبان کے لیکچرر مقرر ہوئے اور بعد ازاں ڈگری کالج نوشکی میں اسسٹنٹ پروفیسر کے طور پر خدمات انجام دے رہے تھے۔

کچھ عرصہ قبل ان کا نام فورتھ شیڈول میں شامل کیا گیا تھا، جس کے بعد ان کا تبادلہ سبی کر دیا گیا تھا، تاہم بعد میں وہ دوبارہ نوشکی تعینات ہو گئے تھے۔

بلوچستان یونیورسٹی کے پروفیسر ڈاکٹر منظور بلوچ کے مطابق غمخوار حیات براہوی اور بلوچی زبانوں کے نمایاں ادیب، شاعر، افسانہ نگار اور مترجم تھے۔

بلوچی ادبی جریدے “زند” کے ایڈیٹر یار محمد بادینی کا کہنا ہے کہ انہوں نے متعدد اہم تصانیف اور مضامین کا بلوچی میں ترجمہ کیا، جبکہ ان کی شاعری کا بڑا حصہ براہوی زبان میں ہے۔

ادبی حلقوں کے مطابق ان کی 15 سے زائد کتابیں شائع ہو چکی ہیں جن میں شاعری اور ادب کے مختلف موضوعات شامل ہیں۔