بلوچستان: پنجگور میں سیکیورٹی فورسز کا آپریشن، 2 کمانڈرز سمیت 4 دہشت گرد ہلاک

واشنگٹن (ش ح ط) پاکستان کے شورش زدہ صوبے بلوچستان کے ضلع پنجگور میں سیکیورٹی فورسز نے انٹیلی جنس بیسڈ آپریشن کے دوران دو اہم کمانڈرز سمیت چار دہشت گردوں کو ہلاک کر دیا ہے۔

پاکستانی فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے دہشت گردوں کے ایک ٹھکانے کو مؤثر انداز میں نشانہ بنایا۔ آپریشن کے دوران دہشت گردوں کے ساتھ شدید فائرنگ کا تبادلہ ہوا، جس کے نتیجے میں چار دہشت گرد ہلاک ہو گئے۔

ذرائع کے مطابق یہ کارروائی پنجگور کے علاقے تاسپ میں کی گئی، جہاں انتہائی اہم دہشت گرد کمانڈرز کی موجودگی کی مصدقہ اطلاع تھی۔ ہلاک دہشت گردوں میں کمانڈر عبدالمطلب اور کمانڈر سلیم عرف راکٹی شامل ہیں۔

سیکیورٹی ذرائع کے مطابق کمانڈر عبدالمطلب ایک ہائی ویلیو ٹارگٹ تھا اور ماضی میں کاؤنٹر ٹیررازم ڈیپارٹمنٹ (سی ٹی ڈی) کا ملازم رہ چکا تھا، جو بعد ازاں دہشت گرد سرگرمیوں میں ملوث ہو گیا۔ وہ علاقے میں دہشت گردی کی متعدد کارروائیوں میں مطلوب تھا۔

آئی ایس پی آر کا کہنا ہے کہ ہلاک دہشت گردوں کے قبضے سے بھاری مقدار میں اسلحہ، گولہ بارود اور دھماکا خیز مواد بھی برآمد کیا گیا ہے۔ سیکیورٹی حکام کے مطابق مارے گئے دہشت گرد علاقے میں دہشت گردی کی مختلف وارداتوں میں ملوث تھے۔

واضح رہے کہ پاکستان میں کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کے لیے سیکیورٹی فورسز کی جانب سے اصطلاح "خوارج" استعمال کی جاتی ہے، جس کا مقصد دہشت گردی اور انتہا پسندی کو نمایاں کرنا ہے۔

جبکہ بلوچستان میں سرگرم بلوچ عسکریت پسند گروہوں کو ریاستی مؤقف کے مطابق بھارتی سرپرستی یافتہ پراکسی گروپس قرار دیا جاتا ہے، جنہیں "فتنہ الہندستان" کے نام سے بھی جانا جاتا ہے، تاکہ بھارت کے مبینہ کردار کو اجاگر کیا جا سکے۔