بلوچستان: پنجگور میں عسکریت پسندوں اور پولیس میں فائرنگ، ایک اہلکار اور ایک شہری ہلاک، دو زخمی

کوئٹہ (نمائندہ ڈیلی اردو) پاکستان کے شورش زدہ صوبے بلوچستان کے ایران سے متصل ضلع پنجگور میں بینکوں کو لوٹنے کے دوران بلوچ عسکریت پسندوں اور پولیس کے درمیان جھڑپ میں ایک پولیس اہلکار اور ایک شہری ہلاک جبکہ دو پولیس اہلکار زخمی ہو گئے۔

پنجگور پولیس کے مطابق پیر کے روز چار گاڑیوں اور موٹر سائیکلوں پر سوار بلوچ عسکریت پسندوں کی بڑی تعداد شہر میں داخل ہوئی اور مختلف علاقوں میں بینکوں کو نشانہ بنایا۔ عسکریت پسند ابتدا میں تین نجی بینکوں کو لوٹنے میں کامیاب ہو گئے۔

پولیس اہلکار نے بتایا کہ اس کے بعد بلوچ عسکریت پسند ایک نجی اور ایک سرکاری بینک کو لوٹنے کے لیے پہنچے، تاہم نجی بینک پر موجود پولیس اہلکاروں نے مزاحمت کی، جس کے نتیجے میں فائرنگ کا تبادلہ شروع ہو گیا۔

جھڑپ کے دوران ایک پولیس اہلکار اور ایک شہری ہلاک جبکہ دو پولیس اہلکار زخمی ہو گئے۔ پولیس کے مطابق نجی بینک پر مزاحمت کے باعث بلوچ عسکریت پسند وہاں سے رقم لوٹنے میں ناکام رہے اور فائرنگ کے بعد فرار ہو گئے۔

فون پر رابطہ کرنے پر ایس ایس پی پنجگور دوست محمد بگٹی نے تصدیق کی کہ پولیس کی بروقت مزاحمت کے باعث بلوچ عسکریت پسند دو بینکوں میں داخل نہیں ہو سکے۔

ان کا کہنا تھا کہ عسکریت پسندوں کی تعداد زیادہ تھی، تاہم پولیس نے بھرپور مقابلہ کیا، جس کے دوران ایک اہلکار ہلاک اور دو زخمی ہوئے۔

ایس ایس پی کے مطابق فائرنگ کی زد میں آ کر ایک شہری بھی ہلاک ہوا، جبکہ واقعے کی تحقیقات شروع کر دی گئی ہیں۔ لوٹے گئے بینکوں سے لے جائی گئی رقم کی تفصیلات بعد میں جاری کی جائیں گی۔