بلوچستان: چمن میں نامعلوم مسلح افراد کی فائرنگ سے جے یو آئی (ف) کے رہنما ہلاک

کوئٹہ (نمائندہ ڈیلی اردو) پاکستان کے شورش زدہ صوبے بلوچستان کے سرحدی ضلع قلعہ عبداللہ کے شہر چمن میں نامعلوم مسلح افراد کی فائرنگ سے جمعیت علماء اسلام (ف) کے ضلعی رہنما مولانا قاری محمد اعظم کو ہلاک کر دیا گیا ہے۔ پولیس کے مطابق حملہ آور موٹرسائیکل پر سوار تھے جو فائرنگ کے بعد فرار ہونے میں کامیاب ہوگئے۔

واقعے کے بعد علاقے میں خوف و ہراس پھیل گیا جبکہ مزید تحقیقات کے لیے سیکیورٹی فورسز نے سرچ آپریشن بھی شروع کر دیا ہے۔ ابھی تک اس حملے کی ذمہ داری کسی گروہ نے قبول نہیں کی۔

سیکیورٹی حکام کے مطابق گزشتہ 24 گھنٹوں کے دوران مختلف پرتشدد واقعات میں مجموعی طور پر 10 افراد ہلاک جبکہ دو افراد کو اغوا کر لیا گیا ہے، جس کے بعد علاقے میں بدامنی کے حوالے سے تشویش میں اضافہ ہو گیا ہے۔

پولیس اور قانون نافذ کرنے والے اداروں نے واقعات کی تحقیقات کا آغاز کر دیا ہے۔