بلوچستان: ژوب میں دہشت گردی کا منصوبہ ناکام، نصیرآباد سے دو مزدور اغوا

کوئٹہ (نمائندگان ڈیلی اردو) پاکستان کے شورش زدہ صوبے بلوچستان کے ضلع ژوب میں سیکیورٹی فورسز نے دہشت گردوں کے ایک بڑے تخریب کاری کے منصوبے کو ناکام بنا دیا۔ پولیس کے مطابق شیخان آبادی کے قریب سڑک کنارے نصب ایک مشکوک ڈیٹونیٹر برآمد ہوا، جسے بم ڈسپوزل اسکواڈ نے موقع پر پہنچ کر ناکارہ بنا دیا۔

ایس ایچ او ژوب کے مطابق بروقت کارروائی سے ایک ممکنہ بڑے جانی و مالی نقصان سے بچاؤ ممکن ہوا۔ علاقے میں سرچ آپریشن جاری ہے جبکہ سیکیورٹی مزید سخت کر دی گئی ہے۔ پولیس نے شہریوں سے اپیل کی ہے کہ کسی بھی مشکوک سرگرمی یا چیز کی فوری اطلاع مقامی تھانے کو دیں۔

دوسری جانب ضلع نصیرآباد کے علاقے تھانہ چھتر کی حدود کنڈھی میں نامعلوم مسلح افراد نے دو مزدوروں کو اغوا کر لیا۔

پولیس کے مطابق مغویوں کی شناخت خادم اور برکت کے ناموں سے ہوئی ہے، جو ضلع بولان کے علاقے بھاگ ناڑی کے رہائشی اور مقامی ٹھیکیدار عطا محمد کے ہمراہ کام کر رہے تھے۔

اغوا کے بعد پولیس نے علاقے میں سرچ آپریشن شروع کر دیا ہے اور مغویوں کی بازیابی کے لیے کوششیں تیز کر دی گئی ہیں۔

حکام کا کہنا ہے کہ واقعے کی تفتیش جاری ہے اور اغواکاروں کے ممکنہ ٹھکانوں کی نشاندہی کی جا رہی ہے۔