بلوچستان: کوئٹہ میں سیکورٹی فورسز کا آپریشن، 18 شدت پسند ہلاک

راولپنڈی (ڈیلی اردو ) پاکستانی فوج کے شعبہ تعلقات عامہ (آئی ایس پی آر) کا کہنا ہے کہ 28 اور 29 اکتوبر کو صوبہ بلوچستان میں آپریشن کے دوران 18 شدت پسند مارے گئے ہیں۔ 

آئی ایس پی آر کا کہنا ہے کہ کوئٹہ ڈویژن کے علاقے چلتن پہاڑیوں میں شدت پسندوں کی موجودگی کی اطلاع پر ایک آپریشن کیا گیا۔

 بیان میں کہا گیا ہے کہ آپریشن کے دوران شدید فائرنگ کے تبادلے میں 14 شدت پسند مارے گئے۔ آئی ایس پی آر کا کہنا ہے ضلع کیچ کے علاقے بلیدا میں بھی انٹیلیجنس معلومات کی بنیاد پر ایک آپریشن کیا گیا۔ 

بیان کے مطابق، اس آپریشن کے دوران شدت پسندوں کا ایک ٹھکانہ تباہ کر دیا گیا جبکہ کارروائی میں چار شدت پسند بھی ہلاک ہوئے۔

اس سے قبل ایک اور بیان میں آئی ایس پی آر کا کہنا تھا کہ صوبہ خیبر پختونخوا کے ضلع کرم میں شدت پسندوں کے خلاف کیے گئے سکیورٹی آپریشن کے دوران ایک کیپٹن سمیت چھ سیکیورٹی فورسز کے اہلکار ہلاک ہو گئے ہیں۔ 

پاک فوج کے شعبہ تعلقات عامہ،آئی ایس پی آر‘ کے مطابق بدھ کے روز سکیورٹی فورسز نے قبائلی ضلع کرم کے علاقے ڈوگر میں انٹیلیجنس کی بنیاد پرسکیورٹی آپریشن کیا جس میں سات شدت پسند بھی مارے گئے جبکہ چھ سیکیورٹی اہلکار بھی ہلاک ہوئے۔