بلوچستان: کوئٹہ میں لاپتہ افراد کی بازیابی کیلئے احتجاجی ریلی

کوئٹہ (ڈیلی اردو/بی بی سی) کراچی میں لاپتہ افراد کی بازیابی کے لیے ہونے والے احتجاجی مظاہرے پر مبینہ پولیس تشدد اور جبری گمشدگیوں کے واقعات میں اضافے کے خلاف صوبہ بلوچستان کے صوبائی دارالحکومت کوئٹہ میں ایک احتجاجی ریلی نکالی گئی۔

بلوچ یکجہتی کے زیر اہتمام ہونے والی اس ریلی کا آغاز بولان میڈیکل کالج سے ہوا۔ ریلی میں خواتین بھی شریک تھیں۔

ریلی کے شرکا مختلف شاہراہوں سے ہوتے ہوئے ریڈ زون پہنچے اور وہاں گورنر ہاؤس کے قریب دھرنا دیا۔ شرکا سے خطاب کرتے ہوئے مقررین نے کراچی میں گذشتہ روز داد شاہ بلوچ سمیت دیگر لاپتہ افراد کی بازیابی کے لیے ہونے والے مظاہرے پر تشدد کی مذمت کی۔ انھوں نے کہا کہ ریلی کے شرکا پرامن طور پر مظاہرہ کر رہے تھے لیکن پولیس اہلکاروں نے مبینہ طور پر بلاجواز تشدد کا نشانہ بنایا۔

مقررین نے کہا کہ جہاں لاپتہ افراد کے لواحقین کو پُرامن احتجاج کے جمہوری اور بنیادی حق سے محروم کیا جا رہا ہے وہاں بلوچستان سمیت دیگر علاقوں سے بلوچ نوجوانوں بالخصوص طلبہ کی جبری گمشدگی میں تیزی آئی ہے۔

انھوں نے الزام عائد کیا کہ گذشتہ ڈیڑھ دو ہفتوں کے دوران کوئٹہ، کیچ اور دیگر علاقوں سے بڑی تعداد میں طلبہ کو جبری طور پر لاپتہ کیا گیا۔

انھوں نے مطالبہ کیا کہ جبری گمشدگی کو جرم قرار دیا جائے، تمام لاپتہ افراد کو بازیاب کیا جائے اور کسی پر کوئی الزام ہے تو ان کو عدالتوں میں پیش کیا جائے۔