بلوچستان: ہرنائی، پنجگور اور لورالائی سکیورٹی فورسز کے آپریشن، 13 دہشت گرد ہلاک، 3 گرفتار

کوئٹہ (نمائندگان ڈیلی اردو)  پاکستان کے شورش زدہ صوبے بلوچستان کے اضلاع ہرنائی، پنجگور اور لورالائی میں سکیورٹی فورسز کے انٹیلی جنس بیسڈ آپریشنز میں کالعدم تحریک طالبان پاکستان (ٹی ٹی پی) اور کالعدم بلوچ لبریشن آرمی (بی ایل اے) کے 13 دہشت گرد ہلاک جبکہ تین کو گرفتار کر لیا گیا ہے۔

ہرنائی

لیویز حکام کے مطابق ہرنائی میں دہشت گردوں کے خلاف کارروائی کے دوران کالعدم ٹی ٹی پی کے کمانڈر سیف اللہ سمیت پانچ دہشت گرد ہلاک ہوئے۔

ابتدائی تفتیش میں معلوم ہوا ہے کہ ہلاک دہشت گرد گزشتہ دو سالوں سے کالعدم بی ایل اے کو دھماکہ خیز مواد اور تکنیکی تربیت فراہم کر رہے تھے۔

پنجگور

پنجگور میں سکیورٹی فورسز نے انٹیلی جنس بیسڈ آپریشن کے دوران کالعدم ٹی ٹی پی کے کمانڈر قاسم کو گرفتار کر لیا۔

تفتیشی ٹیم کے مطابق گرفتار دہشت گرد نے اعتراف کیا کہ اس کے بھانجے اور بھتیجے تینوں کالعدم ٹی ٹی پی سے تعلق رکھتے ہیں اور پہاڑی علاقوں میں مختلف دہشت گردانہ حملوں میں ملوث رہے۔

لورالائی

لورالائی کی پہاڑی علاقوں میں سکیورٹی فورسز نے کالعدم بی ایل اے کے ٹھکانوں کو نشانہ بناتے ہوئے آٹھ دہشت گرد ہلاک کر دیے۔

سکیورٹی فورسز نے صوبے میں دہشت گردوں کے خلاف آپریشنز میں شدت پیدا کر دی ہے اور مزید کارروائیاں جاری رکھنے کا اعلان کیا ہے۔