بلوچستان: ہرنائی سے انسپکٹر سمیت چار سکیورٹی اہلکاروں کی لاشیں برآمد

کوئٹہ (نمائندہ ڈیلی اردو) پاکستان کے شورش زدہ صوبہ بلوچستان کے ضلع ہرنائی کے علاقے شعبان سے چار افراد کی لاشیں برآمد ہوئی ہیں، جن میں دو حاضر سروس اور دو ریٹائرڈ سکیورٹی اہلکار شامل ہیں۔ 

حکام کے مطابق لاشوں میں ایئرپورٹس سکیورٹی فورس (اے ایس ایف) کے انسپکٹر زبیر احمد، سی ٹی ڈی کے سابق اہلکار خلیل احمد، ریٹائرڈ حوالدار محمد صادق اور پولیس سپاہی فرید احمد شامل ہیں۔

ایک سینئر سرکاری اہلکار نے لاشوں کی برآمدگی کی تصدیق کرتے ہوئے بتایا کہ تمام لاشیں کئی روز پرانی تھیں اور انہیں ہسپتال منتقل کرنے کے بعد شناخت کا عمل مکمل کیا گیا۔

حکام کے مطابق اے ایس ایف کے انسپکٹر زبیر احمد اور ان کے دوست خلیل احمد کو 21 جون کو کوئٹہ سے، ریٹائرڈ حوالدار محمد صادق کو 5 جولائی کو ضلع زیارت سے جبکہ پولیس سپاہی فرید احمد کو 5 یا 6 جولائی کو زیارت کے علاقے مانگی سے نامعلوم مسلح دہشت گردوں نے اغوا کیا تھا۔

سرکاری اہلکار کے مطابق چاروں افراد کو چند روز قبل ہلاک کرنے کے بعد ان کی لاشیں ہرنائی کے علاقے شعبان میں پھینک دی گئی تھیں۔

اے ایس ایف انسپکٹر زبیر احمد کے والد نصیر احمد نے اپنے بیٹے کی لاش کی برآمدگی کی تصدیق کرتے ہوئے بتایا کہ ان کی تدفین بدھ کی شام کر دی گئی۔

حکام کا کہنا ہے کہ واقعے کی ذمہ داری تاحال کسی گروپ نے قبول نہیں کی، جبکہ علاقے میں تحقیقات جاری ہیں۔

یاد رہے کہ پولیس سپاہی فرید احمد کو زیارت کے مانگی علاقے سے اغوا کیا گیا تھا، جہاں چند روز قبل نامعلوم حملہ آوروں کے حملے میں متعدد پولیس اہلکار ہلاک ہوئے تھے۔

دوسری جانب سکیورٹی حکام کے مطابق ہنہ اوڑک، ببری، مانگی اور شعبان کے گردونواح میں شدت پسندوں کے خلاف سرچ اور کلیئرنس آپریشن جاری ہے۔ 

حکام کا دعویٰ ہے کہ کارروائی کے دوران متعدد شدت پسند ہلاک ہوئے ہیں، تاہم اس دعوے کی آزاد ذرائع سے تصدیق نہیں ہو سکی ہے۔