بنوں، لکی مروت اور خیبر میں دہشت گردانہ واقعات: پولیس اہلکار اغوا، 10 سالہ بچہ ہلاک

پشاور (نمائندگان ڈیلی اردو)  پاکستان کے شورش زدہ صوبے خیبرپختونخوا کے اضلاع بنوں، لکی مروت اور خیبر میں دہشت گردانہ واقعات کے دوران ایک پولیس اہلکار اغوا اور ایک 10 سالہ بچہ ہلاک ہوگیا۔

بنوں

بنوں کے تھانہ ہوید کی حدود میں دہشت گردوں نے پولیس کانسٹیبل شفیع اللہ خان کو اغوا کر لیا۔ کانسٹیبل شفیع اللہ سپیشل برانچ میں تعینات تھے۔ پولیس نے واقعے کے بعد علاقے کو گھیرے میں لے کر سرچ آپریشن شروع کر دیا ہے۔

دو ماہ قبل بھی واپڈا (پیسکو) کے پانچ ملازمین اسی انداز میں اغوا کیے گئے تھے، جن کی رہائی کے بدلے شدت پسندوں نے ڈیڑھ کروڑ روپے تاوان مانگا تھا۔

مقامی عوام نے مغوی پولیس اہلکار کی بازیابی تک کالعدم ٹی ٹی پی کے مقامی کمانڈر کے والد اور بھائی کو حراست میں لے لیا۔ علاقہ مکینوں کا کہنا ہے کہ جب تک پولیس اہلکار محفوظ طریقے سے بازیاب نہیں ہوتا، انہیں رہا نہیں کیا جائے گا۔

لکی مروت

لکی مروت کے علاقے تختی خیل، نظر دین اڈہ میں واقع ٹیلی فون ایکسچینج کو دہشت گردوں نے دھماکے سے تباہ کر دیا، جس سے عمارت کو شدید نقصان پہنچا۔ خوش قسمتی سے کسی جانی نقصان کی اطلاع نہیں ہے۔ دھماکے کے بعد بم ڈسپوزل سکواڈ اور پولیس نے شواہد اکٹھے کرنے کا عمل شروع کر دیا۔

خیبر

تحصیل جمرود کے علاقے ورمنڈو میلہ میں دھماکے کے نتیجے میں 10 سالہ بچہ ہلاک ہوگیا۔ پولیس کے مطابق دھماکے کی نوعیت معلوم کی جا رہی ہے، جبکہ مقامی ذرائع کے مطابق یہ دھماکہ کھلونہ نما آئی ڈی کی نوعیت کا تھا۔