بنوں خودکش حملہ: 15 پولیس اہلکاروں کی نمازِ جنازہ سرکاری اعزاز کے ساتھ ادا

پشاور (ڈیلی اردو/روئٹرز/بی بی سی) پاکستان کی صوبہ خیبر پختونخوا کے ضلع بنوں میں چوکی فتح خیل پر دہشت گردوں کے حملے میں ہلاک ہونے والے پولیس اہلکاروں کی نمازِ جنازہ پولیس لائن بنوں میں سرکاری اعزاز کے ساتھ ادا کر دی گئی۔

ریجنل پولیس آفس بنوں کی جانب سے جاری بیان کے مطابق نمازِ جنازہ میں ڈی آئی جی بنوں ریجن سجاد خان، ڈی پی او بنوں یاسر آفریدی، ڈی پی او لکی مروت نذیر خان، ایس پی سی ٹی ڈی فضل الواحد، ایس پی ہیڈکوارٹر محمود نواز، ایس پی سٹی توحید خان اور ایس پی رورل حیدر خان سمیت اعلیٰ پولیس افسران، اہلکاروں اور ہلاک ہونے والوں کے لواحقین نے بڑی تعداد میں شرکت کی۔

ڈی آئی جی بنوں ریجن سجاد خان نے اس موقع پر خطاب کرتے ہوئے کہا کہ بنوں پولیس ایک بہادر فورس ہے جس نے ہر مشکل اور کٹھن حالات میں جرات و بہادری کا مظاہرہ کیا ہے۔

انہوں نے کہا کہ دہشت گردوں کی یہ بزدلانہ کارروائی ناقابلِ برداشت ہے اور ہلاک ہونے والوں کے خون کا حساب لیا جائے گا، جبکہ دہشت گردوں کو چن چن کر منطقی انجام تک پہنچایا جائے گا۔

واضح رہے کہ بنوں میں پولیس چوکی پر دہشت گردوں کے حملے میں 15 پولیس اہلکار ہلاک ہوئے تھے، جو حملے کے وقت ڈیوٹی پر موجود تھے۔

اس سے قبل عالمی خبر رساں ادارے روئٹرز نے ایک پولیس اہلکار کے حوالے سے بتایا تھا کہ دہشت گردوں کی جانب سے بارودی مواد سے لیس گاڑی چوکی سے ٹکرائی گئی تھی۔